Heavy crowd gada for Moscow to mourn Russia most significant opposition leader for di past decade, Alexei Navalny, as dem carry im body for burial.
Navalny bin die for prison inside di Arctic Circle, di prison service confam.
Dem see Navalny as di most vocal critic of President Vladimir Putin. E bin dey serve 19-year jail term for offences many pipo consider as politically motivated.
Di 47-year-old blogger – wey survive poisoning wit one nerve agent – die as e dey serve long prison sentence for February 2024, afta more dan three years for detention.
How Alexei Navalny burial happun
Large crowd bin gada outside of di Church of di Icon of Our Lady Quench My Sorrow inside Moscow for di funeral of Russian opposition leader Alexei Navalny.
Wen im coffin bin arrive, crowd begin hala im name.
Navalny mama, Lyudmila, dey present as di crying crowd dey outside di church to greet her shortly afta di funeral service bin end.
Dem no too allow cameras to film di funeral service inside di church but some social media pictures show Navalny for open casket and na like di Russian Orthodox tradition wia pipo go fit see and touch di face of di deceased.
Dem cover im body with red and white roses- and pipo bin surround am- including im mama, Lyudmila, and im papa Anatoliy – holding candles.
Alexei Navalny parents, Anatoliy and Liudmila bin walk to attend di funeral service of dia son for church.
None of dem bin make any public comment bifor dem enter di church.
Na black van bin carry di body of Navalny come di church as di crowd bin dey clap and shout im name wit a long line of pipo wey dey hold flowers and candles.
Odas gather for di streets, some standing on a high point near a supermarket.
Na Hundreds and possibly thousands of pipo bin turn up say goodbye to di late Russian opposition leader.
Dis na act of bravery sake of say hundreds dey detained earlier wen dem announce Navalny death two weeks ago.
Pipo wey dey cry for Moscow dey aware of di possibility of being arrested and dem no carry any political slogans.
More fotos from di burial
- Russian opposition leader Alexei Navalny don die, prison service tok
- Wagner boss Yevgeny Prigozhin ‘dey inside’ Russian plane wey crash, nobody survive
- Wetin we sabi about Ukraine dam incident
