Mass arrest don take place during protests for some ogbonge US universities ova di war for Gaza.
Social posts about di demonstrations dey regularly refer to Intifada – di Arabic word for uprising. Dem dey use am in relation to periods of intense Palestinian protest against Israel.
Many posts ask weda new Intifada go dey as a repercussion of di war for Gaza. Some term am di “Intellectual Intifada” and call to “Globalise di Intifada”.
Students dey waka comot lectures and dey set up encampments to protest against Israel military campaign for Gaza.
Dem don arrest Hundreds of protesters on campuses across di US.
Di institutes include Columbia University and NYU for New York, di University of California for Berkeley and di University of Michigan.
Emerson College and Tufts University, for Boston, and di Massachusetts Institute of Technology (MIT), for Cambridge, don also see protesters.
Dem don suspend many students from Columbia, prompting more voices to call for disciplinary measures to dey dropped or cancelled.
Several Jewish students don express concerns about wetin dem call threatening campus environment.
But oda demonstrators don argue say harassment on Jewish students dey rare and blown out of proportion by those opposed to dia demands.
Activists don dey call for universities to “divest from genocide” and stop investing large school endowments inside companies wey dey involved in weapons manufacturing and oda industries wey dey support Israel war for Gaza.
Wetin Intifada mean?
Di Arabic word intifada translate to “uprising”. Dem don use am describe period of serious Palestinian protest against Israel.
Di First Intifada na from 1987 to 1993. Di Second Intifada na from 2000 to 2005.
Since di recent Gaza war start on 7 October 2023, di term “Globalise di Intifada” start on social posts, wey dey call for pipo around di world to participate in rising up against Israel.
Oda term dem don use. Include “Electronic Intifada”, di “Intellectual Intifada” and call to boycott Israeli products (di “Boycott, Divestment, Sanctions” movement).
So wetin we know of di early Palestinian Intifadas?
First Intifada: Dec 1987 – Sept 1993
Di first Palestinian intifada start on 8 December 1987 for Gaza, wen Israeli army tank transporter lorry crash into cars containing Palestinians.
Four Palestinians die.
Frustration among Palestinians wey dey live under Israeli occupation bin don dey grow for 20 years up till dat day.
Israeli illegal settlements for di occupied West Bank and Gaza Strip don dey spread, while Palestinians dey struggle economically and face constant confrontations wit di Israeli army.
In response to di lorry crash, uprising break out for Gaza Jubalia refugee camp, and spread quickly throughout di West Bank and di Gaza Strip.
Young Palestinians confront Israeli soldiers wit stones and petrol bombs. Israeli soldiers fire live bullets, wey draw criticism from international organisations, including di United Nations.
Violence between di two sides continue, on different levels, until 1993.
Di uprising start as surprise to many parties, including Israel and Yasser Arafat Palestine Liberation Organization (PLO), wey dem exile to Tunisia.
One of di main results of di First Intifada na to attract world attention to di suffering of Palestinians wey dey live under occupation , and especially to di hardline measures wey Israelis use to suppress di uprising.
One famous word wey dem bin dey use den na one wey Israel Defence Minister, Yitzhak Rabin use. He call for “breaking di bones” of demonstrators.
Rabin believe say shooting Palestinians go spoil Israel image for di international community, becos firing live rounds at Palestinians without guns go gain dem sympathy.
As di Intifada progress, di Palestinians move on from throwing stones and Molotov cocktails, to attacking Israeli forces wit rifles, hand grenades, and explosives.
Official sources and analysts assess say Palestinians kill more dan 100 Israelis during di first Intifada, while Israeli forces kill at least 1,000 Palestinians.
Di Intifada end on 13 September 1993, wen Israel and di PLO sign di Oslo Accords, wey provide framework for peace negotiations.
Israel accept di PLO as di representative of di Palestinians, and di PLO renounce armed resistance.
Di Second Intifada: Sep 2000 – Feb 2005
Di second intifada wey dem call di al-Aqsa Intifada.
Di al-Alqsa mosque na di third holiest site for Islam and na di flashpoint wey mark di start of five years of violence.
Palestinian leaders use di shrine name to imply say dis na popular uprising and not acts of violence organised by di Palestinian Authority, as Israel bin argue.
On 28 September 2000, di den Israeli opposition leader, Ariel Sharon, wey Israeli soldiers and policemen dey guide, visit di al-Aqsa mosque.
Dem kill seven pipo in di first day of protests and more dan 100 injure.
Wetin start as hundreds of Palestinian protesters dey throw shoes and stones at Sharon guards lead to demonstrations across di Palestinian territories.
Pictures of di Palestinian 12-year-old boy Mohammed al-Dura wey dem shoot dead for Gaza as im hold im papa, don become some of di most enduring images of di second Palestinian uprising.
Israeli investigation tok say, one French TV news report in 2000 blame Israeli troops for shooting di child dead.
Di most serious differences between di uprising of di eighties and di uprising of 2000 na di level of confrontations and acts of violence.
Di Second Intifada dey violent dan di first.
Di UN say more dan 5,800 pipo die since di start of di Second Intifada for September 2000 until di end of 2007 – nearly two years afta di uprising end.
Although figures dey hard to determine di number of pipo wey die during di Intifada, most analysts believe say many more Palestinians die pass di Israeli.
Palestinian method of attack include firing rockets as well as suicide bombings inside buildings and on buses.
International criticism dey on Israel methods of response at times, but di Israelis argue say dem dey respond to organised armed attacks.