Novak Djokovic show im greatness once again by overcoming im slow start to win di men’s record 23rd Grand Slam title wit victory over Norway Casper Ruud for di French Open final.
Djokovic, 36 years dey far from im best in di initial stages but im quality in a first-set tie-break lay di platform for a 7-6 (7-1) 6-3 7-5 victory.
Di Serb move into di outright lead of men majors ahead of Rafael Nadal.
E also become di first man to win all four majors at least three times.
Victory on di Paris clay move Djokovic alongside Serena Williams in terms of major titles, wit only Margaret Court wey dey now stand in front of am on 24 Grand Slams.
E go get di opportunity to tie Court record for Wimbledon next month – a place wia e already win seven times and be di favourite to equal Roger Federer record tally of men’s titles.
Djokovic, wey also regain di world number one ranking wit im third triumph for Roland Garros, instantly feel flat on im back on celebration as Ruud pull a forehand wide on di second championship point.
Afta commiserating hug wit im opponent, Djokovic run up to im support box wia e celebrate wit coach Goran Ivanisevic, wife Jelena, im two children, parents Dijana and Srdjan and NFL superstar Tom Brady.
Fourth seed Ruud, wey don lose all three of im major finals, congratulate Djokovic on “anoda day, anoda record”.
Addressing im opponent, e add: “Na another day wia you rewrite tennis history. E dey tough to explain how great you are and di kain inspiration wey you be.”
Djokovic don deliver for im date wit destiny
As e no be secret say Djokovic wan win more major titles pass im long time rivals Nadal and Federa.
E bin level wit di two wen im win im 20th for Wimbledon 2021 but fall behind Nadal as e miss di 2022 Australian Open sake of im Covid 19 vaccination status wey make dem deport am.
Nadal come follow win last year French Open but Djokovic jump go front as im win three of di past four Grand Slams.
Even before 14 time French Open Champion Nadal comot dis year competition sake of injury, Djokovic bon dey look like di one to beat for plenti pipo eye even as im physical wahala dey cause problem.
Spanish top seed Carlos Alcaraz na di oda main contender but Djokovic beat am for semi-finals afta di 20 year old bin get bodi cramps from tension wey im dey under as im face one of di all time greats.
For di early part Sunday final against 24 year old Ruud wey bin lose finals twice last year, na Djokovic be like say im dey shake.
E make plenti mistake as Rudd push am enta deep court and waya am 4-2 for first set.
But as di game continue, Djokovic get im koko back.
As plenti ogbonge stars for crowd like French footballer Kylian Mbappe and British actor Hugh Grant dey watch, Djokovic use all im plenti experience to head di tie-break as fourth seed Ruud start shake and afta dat momnet, na only one tin fit happun.
