For time wey di World dey look for answer to di global coronavirus pandemic, one kontri leader don dey di forefront of di battle.
Madagascar President Andry Rajoelina don catch di world attention wit im ‘herbal drink’ wey im say dey cure coronavirus.
- Wetin we sabi about di ‘herb’ inside Madagascar coronavirus cure
- ‘I go prefer make African drug kill me than one western vaccine’
Although di World Health Organization – WHO don warn say di drink need further testing, some African kontris don begin enter queue to order am to test.
On 8 April, president Rajoelina announce to di world di “medicinal plant” wey go see Madagascar” change di course of history” sake of im discovery.
En ce jour de Pâques, #Madagascar adresse un message d’espoir au monde avec notre biodiversité composée de 80% d’espèces endémiques.
Face au #COVID19 nous pourrons proposer un remède traditionnel amélioré constitué de plantes médicinales malagasy qui a déjà fait ses preuves. pic.twitter.com/jku25SKoSH
— Andry Rajoelina (@SE_Rajoelina) April 12, 2020
Despite wetin WHO tok, Rajoelina say pipo wey dey criticize im solution to coronavirus dey show di West attitude towards tins wey come from Africa.
Im say “If e be say na European kontri actually discover dis remedy, so much doubt go dey? I no tink so.”
Who be Andry Rajoelina?
46-years-old Rajoelina na long time businessman and na one-time Disk Jokey alias DJ.
Im enter politics for 2007 wen im contest to be Mayor of Madagascar capital, Antananarivo.
Rajoelina na di 7th president of di island nation, im don marry and get three children.
- Coronavirus Symptoms – Everitin you need to know dey here
- Face mask fit protect you from Covid-19?
- How to self-isolate to prevent di spread of Covid-19
- Africans wey don catch, die or recover from Covid-19 outbreak
Wetin you suppose know about Madagascar
- Madagascar na di fourth largest island for di world after Greenland, New Guinea and Borneo.
- Di kontri get population of ova 26 million pipo according to informate from di World Bank.
- According to di United Nations Office on Drugs and Crime, almost one in 10 Malagasies dey smoke weed.
- Madagascar currency name na Malagasy Ariary and for today market, one Ariary dey equal to $3,827.
- Di French na dem colonize Madagascar, di kontri gain independence on June 26, 1960.