More informate don come out unto di matter wey concern di death of Super TV oga Late Usifo Ataga.
Di latest na say one consultant for di Lagos State DNA and Forensics Centre, Richard Somiari wey appear bifor Justice Yetunde Adesanya of di Lagos State High Court tell di court say di DNA blood sample wey dem collect from Chidinma Ojukwu cloth match Usifo Ataga blood.
Somiari appear bifor di court on Tuesday to tok wetin im see.
Chidinma, na former 300-level Mass Communication student of di University of Lagos, wey dey stand trial ova di death of di oga Ataga along wit her sister, Chioma Egbuchu and one Adedapo Quadri.
Di expert wey be di eleventh prosecution witness, in di murder trial case of Chidinma, tok say di tins wey dem use for forensic investigation na tins wey dem collect from police.
Di forensic expert tok say im get doctorate degree in Bio-Chemistry and im don dey practise for 15 years “I don dey practice in di area forensics for 15 years and I don conduct up to 500 forensics tests,” e tok.
While di witness dey give im testimony bifor di court, e tok say im office collect 21 different items on different days from dia DNA centre staff members.
Im tok say dem collect di items for evidence and di items dem collect include di stained red dress, army green Tshirt, DNA sample from Chidinma.
E tok say dem also collect oda items like urine, blood, gastric content and bile wey dem retain for toxicology report.
Oga Somiari tok say di DNA sample of Ataga match di red dress. However, e explain say di DNA sample no match Chidinma and oda suspects blood.
“For June, I receive two different items of evidence from Rasak Oseni. Army green coloured T-shirt and DNA reference sample from Chidinma Ojukwu,” e tok.
“On July 14, 2021, we receive five items of evidence, we retain dis items in autopsy. Na Urine, blood, gastric content, and bile. Di Deputy Superintendent of Police (DSP), Bamidele Olusegun, receive and retain am for toxicology.”
Di witness confam say im receive di report from di NMS laboratory and dem send di report to di Assistant Inspector General, di Attorney General of Lagos state and di Commissioner of Police Lagos State.
Chidinma lawyer, Oga Onwuka Egwu ask di forensic expert if na so e dey give report of ova counsel 500 reports wey e don conduct.
Di expert respond “no” e tok say e depend on di case but im read di report.
Oga Onwuka ask di witness say if e doubt di findings of Forensic Toxicologist, Andre Caroline Noble.
E respond, “I no fit query di report of a toxicologist becos I no be di one.
“In my position as center director, I make sure say report represent di samples of toxicology analysis.”
Di forensic expoert tok say two members of staff of im organization visit di crime scene, and na investigating police officer give dem access to di scene.
Im add say dem no analyse some items from di scene becos dem no cnsider am probative.
Oga Onwuka ask for di video from di crime scene.
Di court adjourn di case to 30 May for continuation of trial.
- Court admit two statements wey Chidinma Ojukwu write as evidence
- Chidinma Ojukwu dey sleep wit her foster father before she allegedly kill Usifo Ataga – Witness
