Russian billionaire Chelsea owner Roman Abramovich don hand over di control of Chelsea Football Club.
Abramovich say im dey “give trustees of Chelsea’s charitable foundation di stewardship and care” of di club.
Dis decision dey come a day before Chelsea play Liverpool for di League Cup final.
Chelsea and Liverpool go Kwanta for di final of di Carabao Cup on Sunday for Wembley stadium.
Abramovich for statement say: “During my nearly 20-year ownership of Chelsea FC, I don always viewe my role as a custodian of di Club.
“Wey be say my job na to ensure say wey dey as successful as we fit be today, as well as build for di future, while also playing a positive role for our communities.”
Di Chelsea owner add say; “I don always take decisions wit di club best interest at heart. “I remain committed to dis values.”
Roman Abramovich don dey face fresh focus on im activities.
Di move dey in di middle of Ukraine invasion by Russia.
Earlier in di week, UK Labour Party Chris Bryant tell members of parliament say im get a leaked Home Office document wey suggest make Abramovich no dey able to base himself in di UK.
Di Russian billionaire statement continue:
“Dat na why I dey today give trustees of Chelsea charitable Foundation di stewardship and care of Chelsea FC.
“I believe say currently na dem dey in di best position to look after di interests of di club, players, staff, and fans.”
UK on Thursday announce di “largest and most severe package of economic punishment wey Russia don ever see”.
UK Prime Minister Boris Johnson announce di sanctions afta Kremlin invasion of Ukraine.
Di prime minister tell di Members of Parliaments say all di assets for Russian major banks go dey frozen.
Britain dey target more dan 100 individuals and entities.
For 2018 United Kingdom tell di Russian billionaire to prove give dem say im money dey clean if e wan enta back to dia kontri.
