Di Super Eagles of Nigeria go come face to face wit di Mediterranean Knights of Libya on matchday three of di 2025 Africa Cup of Nations qualifiers.
Dis go be di fourth time di two kontris go meet for football match wit Nigeria winning di previous three encounters.
Already Nigeria dey top Group D of di qualifying series wit four points afta one win and one draw while Libya dey bottom of di group wit just one point.
For Austin Eguaveon, di interim head coach of di Super Eagles, dis go be anoda opportunity to prove imsef afta di Nigeria Football Federation give am more time to continue wit di team.
However, Eguaveon go need to make a tough decision on who e go start as im main striker as star boy Victor Osimhen no dey available sake of injury.
In-form Atalanta striker, Ademola Lookman dey sure to start, but e neva clear who go start wit am for di front between Victor Boniface of Bayer Leverkusen and Taiwo Awoniyi of Nottingham Forest.
“Victor Boniface don always be part of dis team and e go continue to be part of dis team. Yes, he bin no dey find di back of di net, and I can assure you say if e start tomorrow, e go score,” Egauveon tok for one press conference on Thursday.
Di time for di match na 5pm Nigerian time, and di venue na di Godswill Akpabio International Stadium for Uyo, Akwa Ibom State.
Sabi pipo for sports matter wey tok to BBC Pidgin say dem no see how di Super Eagles no go collect three points from today game.
Bade Adeleye wey be experienced sports journalist wit di Nigeria Television Authority predict di game to end 3-0 wit Ademola Lookman on di scoresheet.
“For Victor Boniface, I see him getting assist if e no score today,” oga Bade tok.
Anoda ogbonge journalist Patrick Ngwaogwu also predict di same 3-0 final score in favour of di Super Eagles, “and Ademola Lookman na di man wey go deliver for us”, e tok.
Libya coach Nasser Al-Hadiri, admit say im team dey come up against one of di strongest teams for Africa wey dey sure of qualifying for di Nations cup, but dem dey prepared.
“We know say di match here go be very strong game sake of say we dey play a very strong team in Africa.
“After our loss against Benin, our focus now na to improve and see how we go take di next step.”
“Di most important tin for us na to see how we can pressure di Nigeria national team,” Al-Hadiri tok.
- Afcon 2025 qualifiers table, fixtures and results
- Ghana draw with Sudan for di 2025 Afcon qualifier
- Uefa Europa League standings, results and fixtures: Manchester United poor form continue, Tottenham shine
