Di Peoples Democratic Party (PDP) go convene national emergency meeting to elect acting National Chairman plus oda party officials temporarily.
Dis dey come afta one faction of di party National Working Committee (NWC) suspend di suspend di National Legal Adviser, Kamaldeen Ajibade and di National Publicity Secretary, Debo Ologunagba for alleged misconduct.
And anoda faction suspend di acting National Chairman, Umar Damagum and di National Secretary, Samuel Anyanwu for anti-party activity.
One chieftain of di party Kola Ologbodiyan wey confam di recent development within di to BBC Pidgin, say di party go call for emergency meeting to elect temporary leaders, pending wen di national executive convention go hold.
PDP na di main opposition party for Nigeria – dem come into power in 1999 and rule di kontri for almost two decades bifor dem lose power to di All Progressives Congress (APC) for 2015.
According to Ologbodiyan wey be di former National Publicity Secretary of di PDP, e say majority of dia members don tire for di leadership of Oga Damagum.
“Dem don tell am several times to organise national convention, so dat dem go fit elect new leadership for di party,” e tok.
- Rivers political crisis – ‘Conduct fresh election’ PDP tell INEC
- Between Fubara, APC and court – How Rivers state rofor-rofor politics play out in one week
- Rivers crisis kontinu as police declare govnor chief of staff, odas wanted for alleged terrorism, murder charges
Di crisis for di PDP bin take new turn wen di acting national chairman Oga Damagum announce di suspension for di national legal adviser and di publicity secretary during di NWC 593rd meeting wey hold on Thursday 10 October.
One statement wey di party NWC issue read say; “Di National Working Committee (NWC) of di Peoples Democratic Party (PDP) arising from dia 593rd Meeting today, Thursday, October 10, 2024, don direct di National Publicity Secretary (NPS), Debo Ologunagba and National Legal Adviser (NLA), Kamaldeen Adeyemi Ajibade, SAN, to step aside.”
Di statement say di NWC don set up one committee wey di Deputy National Chairman (South) Taofeek Arapaja go head to investigate di issues raised against di officers in compliance wit di provisions of di Constitution of di Party.
Di NWC direct dia deputies to take ova from dem in acting capacity wit effect from Friday, October 11, 2014, pending di conclusion of investigation by di committee.
Ibrahim Abdullahi Manga go be di new acting national publicity secretary and Okechukwu Osuoha go assume di role of di acting national Legal adviser, di statement add.
Moments afta di NWC announcement, Ologunagba, for one statement on Friday, also announce di suspension of Damagum and Anyanwu on top accuse of anti-party activity.
For one statement wey e issue, e say “Di National Working Committee (NWC) of di PDP don extensively consider di series of complaints raised against di Acting National Chairman, Amb Illiya Damagum and National Secretary, Sen Samuel Anyanwu particularly wit regard to di letter wey dem send go di Court of Appeal in Appeal No: CA/PH/307/2024 against di party position for di case wey involve di 27 former members of di Rivers State House of Assembly wey vacate dia seats upon decamping from di PDP to di All Progressives Congress (APC).
“Di NWC condemn dis anti-party activity of di acting National Chairman and di National Secretary wey be gross violation of di provisions of di PDP Constitution (as amended in 2017) and dia Oath of Office.”
“Consequently, di NWC, pursuant to Sections 57, 58 and 59 of di PDP Constitution, don suspend Illiya Damagum and Sen. Samuel Anyanwu as Acting National Chairman and National Secretary of the Party respectively and refer dem to di National Disciplinary Committee for further action.
Di statement add say di two officials don dey suspended from all meetings, activities and programs of di NWC pending di conclusion of one investigation wey di National Disciplinary Committee dey carry out.
How di crisis take start
Ologbodiyan say di crisis for di PDP bin start wen ova 27 members of di Rivers State House of Assembly defect from di PDP go di ruling party, All Progressives Congress.
Di lawmakers at di time tok say di crisis division within di PDP na di primary reason why dem comot di party go APC.
Dia defection come about two weeks afta di former govnor of di state wey now be di Minister of di FCT, Nyesom Wike tell tori pipo say 27 lawmakers for di state dey oppose di state governor, Siminalayi Fubara.
‘’By defecting from PDP, di political Party platform wia dem elect dem for Rivers State House of Assembly, di seats of di 27 former lawmakers don dey vacant’’ PDP statement tok.
PDP ask di Speaker of di Rivers State House Assembly to immediately comply wit di law and declare di seats of di 27 former lawmakers vacant.
Meanwhile, di acting national chairman later write appeal court say di 27 lawmakers remain members of di party.
- Emeka Ihedioha resign from ‘weak’ opposition PDP
- Opposition party clear Rivers Local government elections for di first time since 1999
- Why PDP national chairman, Ayu chop suspension from party
