Bola Tinubu term for office as di 16th president of Nigeria go officially begin on May 29.
Dat na di day im go take im oath of office for Eagles Square for di nation capital Abuja.
On Monday May 22, America president Joe Biden announce di names of delegates wey go attend di ogbonge event.
Marcia L. Fudge di Secretary of di United States Department of Housing and Urban Development, go lead American delegation.
See di oda members of US Presidential Delegation:
- David Greene, Chargé d’Affaires, a.i., U.S. Embassy Abuja
- Honorable Sydney Kamlager-Dove, United States Representative (D), California
- Honorable Marisa Lago, Under Secretary of Commerce for International Trade, U.S. Department of Commerce
- General Michael E. Langley, Commander of U.S. Africa Command
- Honorable Enoh T. Ebong, Director, U.S. Trade and Development Agency
- Honorable Mary Catherine Phee, Assistant Secretary of State for the Bureau of African Affairs, U.S. Department of State
- Honorable Judd Devermont, Special Assistant to the President and Senior Director for African Affairs, National Security Council
- Honorable Monde Muyangwa, Assistant Administrator for the Bureau for Africa, U.S. Agency for International Development.
Di unexplained Nigeria election votes wey political parties dey contest
Wetin be di schedule of Monday events?
8:30 am: All guest go dey seated for Eagles Square ahead of di start of di ceremony
10:00 am: Dat na di time for di inauguration parade/ Swearing- In of di President- elect and Vice-President elect.
How to watch Tinubu inauguration
Viewers for Nigeria fit watch di coverage of Tinubu inauguration live for dia local television station.
Also dem fit follow am live for DSTV for di Nigerian news stations, Channels TV, Arise TV, TVC.
Wia dem go swear in Tinubu?
Eagles Square na di venue for di swearing in ceremony of Tinubu and Kashim Shettima.
Afta di president and im vice take im oath of office, Tinubu go give im inauguration speech for dia.
Buhari go attend di inauguration?
President Muhammadu Buhari and First Lady Aisha Buhari dey expected to attend di ceremony.
Who else go attend di ceremony?
Past presidents, diplomats, heads of international organisations, prominent Nigerians and representatives of foreign goments and agencies.
Those foreign goments na United Kingdom, Canada, France, Saudi Arabia, United Arab Emirates, Pakistan, China, Germany, Finland, Jamaica, Japan, Israel, Turkey and several others
Including African leaders too.
Which oda event go happun afta di inauguration?
1:30 pm: Di post inauguration lunch go take place afta di swearing in ceremony
Na State house banquet hall e go happun. Dis event na strictly by invitation.
Di president go attend dat event as well as oda presidents, heads of goments and im invited guests.
Meanwhile, di Peoples Democratic Party, PDP and Labour Party, LP wey carry second and third for di election dey challenge Tinubu election victory for court.
Di election petition tribunal don begin a pre-hearing of cases ontop di mata.
But di court case no go affect di swearing in ceremony on May 29.
Bola Tinubu profile
Bola Ahmed Tinubu alias Jagaban, na man of many parts.
Tinubu don dey very active for Nigeria politics for many years now.
Di 70-year-old get reputation as a political godfather wey dey use im power and influence to support im candidates.
Im na accountant wit degree from Chicago State University for United States.
Before im join active politics, e work for major companies including Mobil Oil Nigeria.
E leave di corporate world afta im win seat for senate for 1992.
But during military rule for Nigeria, Tinubu bin go exile sake of im involvement wit di pro-democracy National Democratic Coalition.
Afta di death of military leader General Sani Abacha for 1998, im return from exile and immediately return to politics.
Tinubu na two term former govnor of Lagos state, wey serve from 1999 to 2007.
Although im bin no hold any political office afta 2007, but e get hand for di grooming of Lagos state govnors since den.
Jagaban describe imsef as “talent hunter” wey dey “put talents for office, I help dem,” im tell tori pipo Reuters for 2015 during Lagos govnorship election.
