Manchester City show why dem be di team to beat as dem hand Arsenal dia first defeat for di Emirates stadium dis season.
Di reigning Premier League champions see off dia challengers 3-1 thanks to goals from De Bruyne, Jack grealish and Erling Haaland.
Arsenal bin equalise through Bukayo Saka penalty afta De Bruyne capitalise on Tomiyasu shot back pass. Im chip di ball ova Ramsdale to give City di lead.
Di hosts press on to find anoda goal but dat breathrough come from City instea. First Grealish finish off a flowing City move before Haaland break im three-game scoreless run wit a goal for di second half.
Both teams get 51 points each but na City dey top of di table on goal difference although dem don play one game more.
Arsenal go dey frustrated as dis defeat mean say dem don fail to win dia last four matches in all competitions.
Second half
46 mins – Nketiah resume play for Arsenal as di second half don begin.
48 mins – Tomiyasu don collect yellow card for time wasting.
55 mins – Jorginho try to tee up Nketiah, Ederson read di ball well.
57 mins – Referee give Man City penalty afta Gabriel grab Haaland. VAR check am as e be like say Haaland dey offside. Afta some checks, di VAR say Haaland bin dey offside and di yellow card wey di ref show Gabriel dey canceled.
63 mins – Jack Grealish don receive yellow card for bad mouthing di referee.
64 mins – Plenty fouls don dey happun, dis time na Nketiah receive yellow for im foul on Ruben Dias.
66 mins – Arsenal pour forward in numbers. Saka play in Odegaard wey find Tomiyasu. Di Japanese cross di ball in but Nketiah fail to connect wit di ball. Still Arsenal 1-1 Man City.
72 mins – Goal for Man City. Jack Grealish finish up sweet City move as im stroke home Gundogan pass into di net. Arsenal 1-2 Man City.
76 mins – Arsenal bring on Trossard to replace Martinelli.
77 mins – E be like di goalscorer Grealish no go fit continue. Foden don come on to replace im fellow Englishman.
82 mins – Haaland increase City lead. Arsenal 1-3 Man City. Di striker receive di ball from De Bruyne inside Arsenal eighteen with im left, e move am to di right wey im use finish.
83 mins – Arsenal make double substitutions. Ben White and Fabio Vieira replace Tomiyasu and Xhaka.
88 mins – City make anoda change as Guardiola send on Kevin Phillips for De Bruyne.
89 mins – Nketiah head just wide.
90 mins – We go play five extra minutes before dis match go end. As e stand Man City go replace Arsenal for top of di table.
90+4 mins – City dey look to kill time now as dem dey stroke di ball among demsef.
Full time – Arsenal 1-3 Man City.
First half
Both teams dey set to step onto di pitch before dis big match go start.
1 min – Ref Anthony Taylor don blow im whistle as Manchester City take di first kick to begin di match.
Straight from kick-off Arsenal win di ball to create di first chance. Xhaka receive Nketiah blocked shot come fire di ball go ova.
10 mins – City players look like say dem ready for Saka as dem don fall am down two times now.
12 mins – Arsenal look to di ref to blow for penalty as Nketiah fall under late headed clearance by Ake. Instead di ref blow in favour of City as foul on di defender.
16 mins – City work di ball down di right come cross for Haaland wey jab di ball back across goal. No City player dey there to connect wit am. So far both teams never create much.
22 mins – Eddie Nketiah rise highest to meet Zinchenko cross, di forward fail to find di target or even trouble di keeper. See chance!
24 mins – Goal for Man City. De Bruyne pounce on Tomiyasu mistake come chip di ball over Ramsdale. Arsenal 0-1 Man City.
28 mins – Tomiyasu just miss good chance to redeem imsef but im fail top keep im shot down as e go ova.
34 mins – Kyle Walker become di first player to collect yellow card. Di defender wey dey out of di pitch afta im receive treatment come on to clear dangerous ball wen referee never ask am to.
39 mins – Arsenal win penalty. Ederson foul Nketiah inside di box.
42 mins – Goal for Arsenal. Bukayo Saka equalise for di Gunners from di spot.
Arsenal 1-1 Man City.
45 mins – Referee Anthony Taylor don add six minutes addidtional before half time.
45+2 mins – Bernado Silva become di third City player to see yellow card. Di Portuguese bring down Saka.
45+6 mins – Off di bar! Nathan Ake connect wit Rodri header but him touch lead di ball onto di crossbar instead of di net.
Half time – Arsenal 1-1 Man City.
Arsenal vs Man City lineup
Arsenal XI: Ramsdale, Tomiyasu, Saliba, Gabriel, Zinchenko, Odegaard, Jorginho, Xhaka, Saka, Nketiah, Martinelli.
Man City XI: Ederson, Walker, Ake, Dias, Rodri, Gundogan, De Bruyne, Silva, Mahrez, Grealish, Haaland
