Police for Ghana say dem kill two police officers who be suspects inside de series of bullion van robberies wey hit de country.
Dem shoot de two police officers for dia Borteyman hideout near Ashaiman on Tuesday.
- How four armed robbers on motorbike open fire on armoured bullion van for Ghana
- How boyfriend allegedly kill en girlfriend, dump her body for fridge inside
Inside statement wey public affairs director, DCOP Kwesi Ofori release, he explain say exchange of gunshots happen during de raid, wey two policemen, No.58284 Constable Reindolph Gyimah Ansah den No. 53549 Lance Corporal Stephen Kwaku Nyame wey dem arrest earlier in connection with de Bullion Van Robberies chop bullet den die.
Who be de police officers arrested for de robberies?
Police say dem also arrest four other officers in de process of de raid, including one civilian as prime suspects in de bullion van robberies.
Meanwhile, other suspects who sustain gunshot wounds manage escape.
DCOP Kwesi Ofori talk say make de general public report any persons wey report for hospital with gunshot wounds.
Dis be sake of some of de people wey escape sustain gunshot wounds.
De police officers dem arrest as suspects dey include No. 58370 Constable Affisu Yaro Ibrahim, No 58355 Constable Richard Boadu, No. 58525 Constable Rabiu Jambedu, No. 58586 Constable Albert Ofosu and de civilian suspect Razak Alhassan.
Background to de robberies
Police on Monday reveal say dem make breakthrough in dia investigations into bullion van robberies which show say some policemen dey involved.
Series of bullion van robbers hit Accra leading to de death of one officer for Adedenkpo, Jamestown.
According to police, e be like dem specialize in bullion van robberies.
Dem directly link de rogue officers to a number of bullion van robberies including attack on bullion van near Kingsway, in February 2021 den another for Baatsona, Spintex, around March 2021.
De third robbery attack dem investigate be de Jamestown, Adedenkpo bullion van robbery in June 2021.
Amd finally de recent attempted robbery for North Kaneshie Industrial Area, around February 2022.
Rise in bullion van robbery attacks
Bullion Van attacks make rampant for Ghana in recent past, situation wey result in removal of former IGP den de introduction of de current IGP Dr George Akuffo Dampare.
Around January 2021, armed robbers attack bullion van for Fomena, Ashanti Region where dem steal Ghc500,000.
Dem kill Police in de process of de attack, police arrest five suspects in relation to dis robbery incident.
Another attack on ambulance happen for Koforidua in March dis year where robbers kill Ambulance driver, Abraham Tetteh during de robbery sake of dem mistake de ambulance for bullion van.
Also, another incident for Accra Spintex road around March when armed robbers attack bullion van in one of de suburbs for Spintex, dem assault dis driver.
On May 2020, four armed robbers attack bullion van for Techiman, dem steal over Ghc 600,000.
Many other similar incidents of robberies make rampant for Ghana sake of de weak nature of bullion vans wey banks dey use.
Only last week, some unknown men attempt to rob bullion van around North Industrial area.
But de robbery fail sake of one nearby police start dey shoot at dem wey de cash in transit van be bullet proof.
