American model Chrissy Teigen say she don block one million pipo comot her social media account because dem dey worry her and now she no get dia time again.
For tweet, di model wey be US musician John Legend wife abuse dis pipo she block, say dem be “sick psychopaths”.
“Psychopath” na name of pesin wey get mental sickness, wey no fit feel di kain emotion wey oda pipo dey feel.
But wetin dis pipo do madam Teigen?
I have block chained over one million people, ONE MILLION people today and I am still flooded with sick psychopaths. So please, spare me the “just ignore them, they’re just trolls”
— chrissy teigen (@chrissyteigen) July 15, 2020
Dis fit relate to one scandal about convicted child sex offender Jeffrey Epstein.
Some pipo bin come out to accuse Teigen say she bin travel, wit her husband, inside di late Epstein plane and even follow am do di bad work to recruit underage girls for di crime.
Teigen don deny dis accuse and maintain say she no get anything to do wit Epstein.
But di abuse come gada strength afta authorities recently arrest oga Epstein girlfriend Ghislaine Maxwell and accuse her too of sex trafficking.
Di day before, on 14 July Teigen confam say she don delete 60,000 tweets.
For Twitter, madam Teigen say she no wan hear advice of “no give dem ear, na trolls dem be” because although she don block one million, di “sick psychopaths” still dey worry her.
She para her accusers – wey she call “trolls” – no gree her rest and say na dis kain tin dey sweet dia belle.
Anyhow I’ll do my best to stop entertaining them. They have definitely been living for this and have zeroed in on ONLY me. Thank u to EVERYONE for helping me, in and out of the dm’s. People I’ve never met have been so, so kind and huge thank you to @yashar especially
— chrissy teigen (@chrissyteigen) July 15, 2020
She go on to thank pipo wey don help her during dis gbege. She mention one journalist Yasha Ali for im ogbonge help, even say she love am.
