One tanker wey carry fuel explode and burn, kill 94 pipo for Jigawa State, wey dey northern Nigeria.
Di police tok-tok person for di state, DSP Lawan Shiisu Adam, tell BBC Pidgin say 94 pipo die for di spot wen di tanker catch fire, and about 50 pipo injure.
Di accident happun on Tuesday around 11:30 pm afta di tanker bin comot from Kano to Nguru wey dey for Yobe state, di driver loose control of di truck wen e reach Majiya, one town for Taura Local goment Area for Jigawa State.
- ‘My son bin wan marry later dis year bifor tanker explosion kill am wit 60 pipo for Niger State’
- Road accident kill 54 pipo in one day for Nigeria
Afta di tanker fall, di fuel wey e dey carry pour for road and di gutter wey dey for di side of di road.
DSP Lawan tok say as pipo see di fuel, dem rush go di place go pack am, afta dem don overpower di security pipo wey dey try stop dem make di tanker no explode.
“We try our best to stop pipo from going to di to get petrol but despite say we block di area, dem overpower us and as pipo bin dey scoop fuel, fire burst,” E tok.
Di victims don bin take to Ringim and Hadeja general hospitals for treatment.
But DSP Lawan tok say di tanker driver escape wit im life afta di tanker fall.
Di driver, wey no injure dey police custody while dem dey conduct investigation.
Videos and photos wey don circulate online show pipo wey dey burnt beyond recognition as dem scatter for di area of di explosion.
Dem cover some of di dead bodies with tree branches as pipo gada to look.
Dis incident dey happun as citizens of Nigeria dey cry under di latest hike in price of petrol wey many say don dey above di reach of di masses.
Dis na di third time for 2024 wey price of fuel dey go up. E don rise from about 187 to 1,100 naira in just one year.
Meanwhile, fuel tanker explosions and accidents dey common for Nigeria – e dey happun sometimes sake of bad roads and vehicles.
Earlier for September, 59 people die for Niger state after one fuel tanker jam lorry wey carry passengers and cattle.
Police say dem go do investigation to find wetin cause di tanker accident wey make plenty pipo lose dia life.
- ‘My son bin wan marry later dis year bifor tanker explosion kill am wit 60 pipo for Niger State’
- Access bank, Tinubu, odas mourn CEO Herbert Wigwe, wife, son and odas wey die inside helicopter crash for America
- Road accident kill 54 pipo in one day for Nigeria
