President Bola Tinubu address Nigerians on June 12 Democracy Day, to mark di kontri 25 years of uninterrupted democracy.
For im speech, di president touch on some of di issues wey dey face di Nigerian pipo.
Di president tuale some of di many Nigerians wey contribute to di struggle.
President Tinubu also honour di media for dia work during di struggle for democracy.
According to di president, Nigeria gatz continue wit democracy no mata how complicated e fit be.
Dose President Tinubu celebrate celebrate include MKO Abiola, winner of di June 12, 1993 presidential election and im wife Kudirat, General Shehu Musa Yar’Adua and Pa Alfred Rewane, plus odas wey die for di sake of di struggle.
E celebrate some of di founding fathers of Nigeria democracy wey include Anthony Enahoro, Abraham Adesanya, Commodore Dan Suleiman, Arthur Nwankwo, Chukwuemeka Ezeife, Admiral Ndubuisi Kanu, Frank Kokori, Bola Ige, Adekunle Ajasin, and plenty odas from different parts of di kontri.
Di president troway salute give di kontri men wey bin live on exile for at least six years sake of dia fight for di kontri to return to civilian rule.
Inside dis group na pipo like General Alani Akinrinade, Professor Bolaji Akinyemi, Professor Wole Soyinka, Ralph Obioha, and odas.
Tinubu also tuale im fellow National Democratic Coalition (NADECO) members wey bin remain for Nigeria to continue di fight for democracy.
E no also forget to hail Nigeria tori pipo for dia contribution to di struggle for di kontri demcocracy.
Highlights of President Tinubu address
Minimum wage
President Tinubu tok say im don negotiate wit organised labour on a new national minimum wage.
E say im administration go soon send executive bill to di National Assembly to stipulate wetin don dey agreed upon as part of of Nigerian law for di next five years or less.
“In di face of labour call for a national strike, we bin no seek to oppress or crack down on di workers as a dictatorial goment go don do. We choose di path of cooperation ova kasala,” Tinubu tok.
“Di president tok say im take on “dis vital task witout fear or favour and I commit mysef to dis work until we don build a Nigeria wia no man dey oppressed.”
- Push for six-year single term for president, govnors – wetin lawmakers wan achieve
- Nigeria National Anthem: Who compose ‘Nigeria We Hail Thee’?
- ‘Nigeria we hail thee’ na our heritage – Tinubu on why Nigeria reverse to old national anthem
Rights, freedoms, and liberties of Nigerians
President Tinubu tok say as leader of di nation, im vow to do im utmost best to protect di rights, freedoms, and liberties of Nigerian citizens.
“Even more dan dat, I pledge to do whatever dey necessary to cement democracy as our way of life.
“Although di challenges dey steep and multiple, I dey grateful to lead Nigeria at dis moment in her history and point in her democratic journey.”
Economy
President Tinubu for im speech tok say im go use di opportunity of Democracy to take defend di economy of Nigeria.
Im add say Nigeria economy no too balance sake of say di past goment don depend ontop oil too much.
“We gatz commit oursef to di realisation of economic democracy.”
“I feel your pains but I go continue to refine di economy. Our economy dey unbalanced becos say e dey built on oil exploration.”
Pipo wey wan destroy democracy
President Tinubu remind Nigerians say even though democracy fit dey complicated sometimes, na still di best choice for Nigeria.
“As Nigerians, we gatz remind oursef say no mata how complicated democracy dey, na di best form of governance in di long run,” im tok. E add say make di pipo shine dia eyes as e get some pipo wey wan destroy democracy.
E say no be like say dis pipo wan make tins beta o, but dem wan scata democracy so dem go fit control anybody wey no dey for dia gang.