Governor of Edo State, Godwin Obaseki don appoint Omobayo Marvellous Godwin as Deputy Governor of di State.
Dis dey follow di impeachment of Philip Shaibu as Deputy Governor of Edo State Hiuse of Assembly on Monday.
Omobayo Marvellous na 38 year old Electrical Electronics Engineer wey get experience in di oil and gas sector.
Omobayo bin contest as Labour party candidate for Federal House of Representatives seat of Akoko-Edo Federal Constituency during di 2023 elections.
As tori of im appointment dey spread, stakeholders dey wait for reactions from various quarters, to see how di new deputy governor go navigate di challenges and opportunities wey dey ahead for Edo State.
Edo State House of Assembly impeach Shaibu afta e refuse to honour invitations by di seven-man panel wey investigate allegations against him.
Afta im refusal, di panel led by Justice S.A. Omonua (rtd) write report wey recommend im removal, say Shaibu no take di opportunity to defend imsef.
For dia sitting on Friday, Justice Omonua lament about di former deputy governor absence say, “dis na di position of di panel. Di panel adjourn sitting to today (Friday) for di last time for di respondent to present im defence, and di respondent still no come before di panel.”
Lawyer to di former deputy governor, Professor Oladoyin Awoyale, SAN, bin don withdraw from participating in di proceedings afta di panel rule against im motion as e ask di panel to comply wit Federal High Court Abuja wey order di panel to show cause why dem no go grant injunction to maintain status quo till dem determine di mata before dem.
Tins begin fall apart between Govenor Obaseki and deputy govnor Shuaibu wen Shuaibu show interest say im wan succeed Obaseki for di 2024 election.
Di gbege begin dey happun wen informate reach di public say im no tell di govnor about di decision.
One of di many tins wey happun for back between di Edo state govnor and im deputy na wen Shuaibu waka comot of one goment event afta dem force im aide out of di hall.
Di drama happun during di colloquium wey hold at di Sir Victor Uwaifo Creative Hub wey dem use mark di 60th-anniversary celebration of di Midwest Referendum.
On anoda occasion, security operatives bin stop di deputy govnor as im wan try reach di govnor during di church service wia dem dey mark di 32nd anniversary of di creation of state.
Di drama dey surprising to pipo as di security no allow Shaibu greet Obaseki and oda dignitaries wey come di event.
Later accuse say di Deputy Givenro leak official goment secret also arise as di Panel wey chook eye for di mata bin want make e defend imsef against dis allegation but e no show for di time dem invite am.
Shaibu come file case against im boss for Federal High Court. But by 5 September 2023, e withdraw di case sake of say some prominent pipo for di state intervene.
Na crime to get ambition?
Di former deputy govnor of Edo State, Philip Shaibu don tok say im denounce di “illegal impeachment” wey di house of assembly member forcefully impose.
Shaibu tok dis inside one video for im Facebook page afta im impeachment as di state deputy govnor on Monday.
Philip Shaibu tok say dis no be just attack on am but attack on di democratic principle and threaten to democratic process for di state.
E tok say di move dey dangerous and e fit lead to dictatorship
Di former deputy governor tok say di impeachment dey harsh becos im dey ambitious to contest for di upcoming election as di govnor of Edo state.
“Make e dey clear say di impeachment dey hard becos of my ambition to contest di Edo state 2024 govnorship election under di PDP,” Phillip Shaibu tok.
“Ambition wey be legal to all citizens of di Federal Republic of Nigeria. Na sad reality for our political landscape say dem dey resist ambition and pipo wey dey power dey seek to silence opposition through illegitimate means.”
Di former deputy govnor tok say im don dedicate im life to serve di pipo of Edo state and work tirelessly to improve di life of di pipo but instead im dey faced wit baseless accusations.
E add say di allegation wey im face na just cover for dia true motive to impeach am commot from office and na betrayal to di trust wey pipo of Edo state get im dia political leader.
- Gbege between govnors & dia deputies – Di drama for Edo and Ondo states
- I no go support inexperienced pesin wey wan just come take – Obaseki
- Who be di APC, LP, PDP candidates for Edo govnorship election?
