American rapper, Nicki Minaj don announce say she get belle.
She share di foto of her baby bump for her Instagram wey she tag #preggers and fans don already dey congratulate her.
- See di full list of nominees for di 2020 Golden Globes
- Angelique Kidjo, Davido dey among celebrities Apple Music dey celebrate dis May – See di list of celebs
For September 2019, di award-winning rapper wey dey married to Kenneth Petty bin announce say she dey retire from music to start her family.
Before she retire, dis na some ogbonge tins wey she achieve
36-year-old Onika Tanya Maraj-Petty aka Nicki Minaj bin start her music career for 2004 but she drop her first studio album, Pink Friday for 2010. Di album wey feature songs like “Right Thru Me”, “Moment 4 Life” bin enta number one spot for di US Billboard 200 chart.
Pink Friday bin bring her first Grammy nomination for 2012 under di Best Rap album, Best New Artist and Best Rap Performance categories.
Though she no get any Grammy, she don win six American Music Awards, 10 BET awards, seven BET Hip Hop Awards, four Billboard Music Awards, five MTV Video music awards, six MTV Europe music awards, two People’s Choice Awards, one Soul Train award and four teen choice Awards.
For 2013, she bin sit as judge for di twelfth season of American Idol.
She bin also do some acting for di first time for 2012 wen she act for di popular cartoon feem, Ice Age: Continental Drift. Oda feems wey she act inside na The Other Woman for 2014 and Barbershop: The Next Cut for 2016.
