More dan one million pipo don lose dia houses and many don die sake di flood wey happun for Maiduguri, di Borno State capital.
Borno state Govnor, Babagana Zulum don tell BBC News say di number of pipo wey di flood bin affect for Maiduguri go fit pass two million.
For one interview wey Zulum do with BBC on Thursday, di govnor tok say di full level of di damage and how many pipo don die go show wen di floodwater don dry.
Search and rescue still dey happun, days afta di Alau dam overflow for Maiduguri, wey cause di worst flood wey dem ever see for di city for di past thirty years.
- Oda times failure of dams don cause flood disaster for Nigeria
- ‘I bin tink say me and my children go die’ – Sad tori of victims of Maiduguri flood disaster
Thousands of pipo wey flood don pursue from dia house dey stay for four different camps but plenty pipo still dey trapped.
Many people don stay for roof witout food for days. Governor Zulum goment don dey share food but e be like say na small tin for di big wahala.
Zulum tok say, “E no ever dey enough, dia is no way we fit provide food for millions of pipo for just one or two hours.
We decide to organize ourselves wey be di only way, we organize to make sure say di pipo wey di flood affect go camps, den we go carry help go give dem for di camps.
Otherwise, you know, many go die becos dem no go get food and oda tins wey dem need wen dem dey for line.” E tok.
Zulum tell BBC News say e dey worried about di news say some prisoners, including Boko Haram pipo, don bin escape afta di flood hit di prison.
“I dey worried but you also need to remember say Borno State Goment don start wetin we dey call Borno Model of Rehabilitation wey don make many Boko Haram members change dia ways.
“For di last two years, over 200,000 Boko Haram and dia families don change dia mind. And I feel say dis tin don give us better result to bring peace and stability come back for Borno State.”
Mr. Zulum also tok say di dam wey collapse no get maintenance for long time and di heavy rain wey fall dis year join add for di cause of im collapse.
“Wetin happun be say, di Federal Ministry of Water Resources suppose dey maintain di dams but dem no do am for long time. Dis na someting we need to put head togeda to do,” Zulum tok.
“But di most important tin na say dis year rain plenty well well, so di rain pass wetin di dam fit carry.”
E still dey worried say di flood don add to di Boko Haram wahala wey don dey worry di state for di past 15 years.
“I remember say more dan 300,000 people don die for Borno State.”
E add say, “thousands of classrooms bin don spoil, hundreds of health centres also sake of Boko Haram.
We just dey try to come out from dis problem.
And now, we dey see anoda disaster, one serious wahala, anoda serious human crisis, wey di state goment no fit carry alone,” e tok.
Reports say dis na di worst flood wey don happun for Borno state since di one wey happun more dan 30 years wey pass.
- States for Nigeria wey go witness flood inside 2024 – NiMet
- How weeks of rain in Kenya don lead to deaths, floods plus affect school resumption
- Wetin be Storm Shadow missiles and why e dey important for Ukraine war against Russia?
