Researchers for Gabon don study di plants wey wild gorrilas dey chop and wey local human healers dey use, and dem don find four wey get medicinal effects.
Lab studies don find say di plants dey high in antioxidants and antimicrobials.
One get promise say e fit fight superbugs.
Great apes dey known to treat demsefs by selecting di plants wey get medicine.
One orangutan wey wound recently make headlines afta e use plant paste to take treat di injury.
- Me-ow! Wetin to know about goment cat tax plans wey dey make pipo para
- Scientists reveal why sharks dey test positive to cocaine
For new study, botanists record which plants di western lowland gorillas for di Moukalaba-Doudou National Park for Gabon dey chop.
Dem find four trees wey dem find to dey beneficial based on wetin local healers tell dem. Di trees na di fromager tree (Ceiba pentandra), giant yellow mulberry (Myrianthus arboreus), African teak (Milicia excelsa) and fig trees (Ficus).
Di bark of dis tress wey dem dey use for traditional medicine to treat evritin from stomach wahala to infertility, bin get chemicals wit medicinal effects, like phenols to flavonoids.
All four plants bin show say dem get antibacterial effects against at least one multidrug-resistant strain of E. coli.
Dem tok say di fromager tree gan-gan bin show “remarkable activity” against all di strains dem test am wit.
Dr Joanna Setchell wey be anthropologist for di University of Durham for UK say, “e mean say gorrilas evolve to chop plants wey benefit dem and show say we no too sabi wetin dey inside di Central African rainforests.”
Dr Setchell bin work for di study wit di Gabonese scientists.
Gabon get plenti forests wey pipo neva explore. Di forests get forest elephants, chimpanzees and gorillas plus many plants wey science neva sabi.
Poaching plus disease don make many of di western lowland gorillas to disappear for di wild.
Dem dey classed as critically endangered for di International Union for Conservation of Nature’s Red List.
Dem publish dis research for di journal wey dem dey call PLOS ONE
- How millions of donkeys dey die evri year sake of medicine wey pipo dey use dem do
- Germany sign agreement wit Kenya to welcome 250,000 Kenyans to come work
- Ugandan Olympian wey her ex-boyfriend kill don make her final journey home
