Di Champions League go return dis week, wit some ogbonge fixtures.
BBC Sport don pick out 25 players outside di Premier League to watch dis season, from di very obvious ones to some talented youngsters.
Kylian Mbappe, 25 (Real Madrid/France)
Forward Mbappe only need to score twice to enta di top-10 European Cup goalscorers ever dis season. But im neva lift di trophy.
Im move from Paris St-Germain to perennial European champions Real Madrid mean say dis fit be di year.
Jude Bellingham, 21 (Real Madrid/England)
Midfielder Bellingham bin pass all expectations last season, scoring 23 goals in all competitions as Real Madrid win di Champions League and La Liga.
Di goals bin dry up small though afta Christmas, two big goals aside, im Euro 2024 performances for England no too dey exciting.
Im fit shine for Champions League dis season?
Lamine Yamal, 17 (Barcelona/Spain)
Na di most exciting youngster for di world. Di winger make name for imsef for Barcelona last season, by breaking several records at di age of 16.
But im become global star for Euro 2024, e help Spain lift di trophy.
Im fit live up to di hype dis season? Already im get three La Liga goals.
Dani Olmo, 26 (Barcelona/Spain)
Na one of Spain European Championship stars, di attacking midfielder dey play im senior football for a Spanish club for di first time.
Barca summer signing from Leipzig score for im first three appearances for di club but im dey out of action for di next four to five weeks afta im get hamstring injury. Im fit return back for Barcelona Champions League clash wit Bayern Munich on October 23.
Harry Kane, 31 (Bayern Munich/England)
Striker Kane don begin im annual hunt for im first trophy again.
Last season im score 44 goals for Bayern but dem no win any silverware for di first time in more dan a decade.
Di big kwesion na weda e go change under former Burnley boss Vincent Kompany
Michael Olise, 22 (Bayern Munich/France)
Na anoda Londoner for Bayern, although Olise make im senior France debut dis month for Nations League games.
Di winger, na big summer signing from Crystal Palace, im go hope to impress for im first season wey im dey play for Europe.
Xavi Simons, 21 (Leipzig/Netherlands)
Di versatile attacking midfielder don move on to Leipzig from Paris St-Germain for di second season in a row.
Im bin score 10 goals and register 15 assists in 43 games last season – and im go seek to improve on dat tally dis time.
Antonio Nusa, 19 (Leipzig/Norway)
Di latest Norwegian wonderkid, winger Nusa join Leipzig from Club Bruges dis summer – despite Chelsea interest, Tottenham and Brentford.
Im don already score twice for im new club, wey don take am halfway to im best goalscoring season already.
Julian Alvarez, 24 (Atletico Madrid/Argentina)
Forward Alvarez don already score eight Champions League goals and don win trophy bifor – but dis go be im first season as di main man in a team.
Atletico Madrid go expect am to deliver afta dem pay £81.5m to buy am from Manchester City.
Conor Gallagher, 24 (Atletico Madrid/England)
Midfielder Gallagher finally complete im on-off transfer to Atletico Madrid from Chelsea – and e look like say im don settle in well.
Im energy and drive fit see am become a favourite of Atleti boss Diego Simeone.
Joao Neves, 19 (Paris St-Germain/Portugal)
Defensive midfielder Neves join PSG from Benfica for a fee of at least £50m, for one of di biggest signings of di summer.
Im don already play 75 first-team games for Benfica, four for PSG and win 11 caps for Portugal, despite being a teenager.
Desire Doue, 19 (Paris St-Germain/France)
Na anoda teenager wey join PSG dis summer for big-money – dem pay Rennes £42m to sign di attacking midfielder Doue.
Tottenham and Bayern Munich bin dey eye di exciting youngster, wey fit play on di wing or centrally.
Viktor Gyokeres, 26 (Sporting CP/Sweden)
Gyokeres dey considered as one of di most dangerous strikers for Europe, even though im neva play for one of di top leagues.
Im don play for di second tiers for Sweden, Germany and England – for Swansea and Coventry – and im don score 51 goals in 56 games for Sporting.
Dis go be im first season for Champions League.
Ademola Lookman, 26 (Atalanta/Nigeria)
Winger Lookman don become new man since im join Atalanta for 2022, im score 33 goals in just over two years – including hat-trick for di Europa League final against Bayer Leverkusen.
Di London-born player bin fail to hit double figures in any of im seasons for England and im go dey hope to add to di 61 minutes of Champions League experience wey im bin get Leipzig.
Angel Gomes, 24 (Lille/England)
New England international Gomes still remain as Manchester United youngest Premier League player, im bin make im debut age 16 in 2017.
But na for Lille wia di flexible midfield player make im name, and make a Ligue 1 high of eight assists last season.
Georgi Sudakov, 22 (Shakhtar Donetsk/Ukraine)
Di talented midfielder bin turn down di chance to move to Juventus and Napoli earlier dis year to stay wit Shakhtar Donetsk, despite di war between Ukraine and Russia.
Sudakov go dey eye anoda good Champions League campaign, afta im goal against Barcelona last season.
Arne Engels, 21 (Celtic/Belgium)
Celtic bin spend big dis summer wit di £11m club record signing of midfielder Engels, wey make im Belgium debut earlier dis month.
Last season im bin dey regular player for Augsburg for Bundesliga for different positions, including all across di midfield and for right-back.
Florian Wirtz, 21 (Bayer Leverkusen/Germany)
Florian Wirtz don dey around for years but im still only be 21. Im don spend im senior career so far wit Bayer Leverkusen and, wit dia German double win last season, di ginger for am to move on to win trophies fit don die down.
Twelve of im 44 Leverkusen goals come for Europa League, but dis na im first season for Europe top competition.
Jeremie Frimpong, 23 (Bayer Leverkusen/Netherlands)
Frimpong shine last season as a right wing-back for Xabi Alonso nearly unstoppable Leverkusen team.
Im score 14 goals and provide anoda 12 assists in all competitions. Di kwesion now na weda im fit shine for Champions League?
Martin Baturina, 21 (Dinamo Zagreb/Croatia)
Di small midfielder, wey many dey call di next Luka Modric, don dey linked to Juventus and Arsenal but im still remains wit Dinamo Zagreb for now.
Im bin dey part of Croatia Euro 2024 squad, Dis na im second season for Champions League group stages afta 2022-23.
Serhou Guirassy, 28 (Borussia Dortmund/Guinea)
Striker Guirassy join Borussia Dortmund for wetin wey fit be bargain £15m dis summer, afta im breakout season for Stuttgart end wit am scoring 28 goals in 28 Bundesliga games – at di age of 28.
Im bin dey unlucky not to win a Golden Boot, wit im Bundesliga rival Kane di only player to score more for Europe top five leagues.
Dis n aim second season for Champions League afta di 2020-21 campaign wit Rennes – wen im bin score goal against Chelsea.
Anatoliy Trubin, 23 (Benfica/Ukraine)
Ukraine keeper Trubin dey enter im fifth season for Champions League wit Shakhtar Donetsk and Benfica -e no bad for a 23-year-old.
Im bin make 37 appearances for Europe already, including di Europa League and qualifiers.
Bobby Clark, 19 (Salzburg/England)
England Under-20 midfielder Clark na one of di so-called Jurgen Klopp kids for Liverpool last season, e play 12 times. Im become dia youngest ever European goalscorer wit im Europa League goal against Sparta Prague.
Kenan Yildiz, 19 (Juventus/Turkey)
Na one of Turkey exciting young talents for Euro 2024, attacking midfielder Yildiz go hope to make im Champions League debut dis season.
He played 32 times for Juventus last season, scoring four goals.
Johan Bakayoko, 21 (PSV/Belgium)
Di Belgium winger bin score 14 goals and bag 14 assists for Dutch champions PSV in all competitions last season.
No doubt about Im ambition – Im say im want to challenge for di Ballon d’Or within five years.
Im go dey hope to get a lot more game time dis season afta im £10m move to Austria to play for Salzburg, wey dey managed by ex-Liverpool assistant Pep Lijnders.
- Uefa Champions League 2024/25 full pairing
- Meet di Africans for di 2024 Ballon d’Or award
- Afcon 2025 qualifiers table, fixtures and results
