Chelsea, Liverpool, Mancity and Manchester United na EPL top four dis season.
Dis wan na as Liverpool win dia game 2-0 against Crystal Palace to secure dia place while Tottenham win Leicester 4-2, to help Chelsea wey lose 2-1 to Aston Villa, to secure dia place for number four position.
Liverpool get di result dem need against Palace, as Sadio Mane score from a corner nine minutes before half-time to make fans mind come down.
Di Senegal forward wrap up di victory and dia place for Champions League with one deflected shot in di 74th minute.
Meanwhile, Leicester no fit secure a place in di Champions League, for di second season running on di dramatic final day for di Premier League, as Gareth Bale score two late goals to give Tottenham victory.
As dem start di last round of fixtures in fifth place, the Foxes bin know say dia best hope of finishing in di top four na with a win, with hope say Liverpool and Chelsea go fumble for dia own final games.
Although Chelsea fumble, as dem lose 2-1 for Aston Villa, Leicester on dia own, no do dia part, as dem fail to defeat for di King Power Stadium despite say dem lead twice to finish one point behind Thomas Tuchel Blues.
Arsenal win but miss out on Europa League
Nicolas Pepe score twice in di second half as Arsenal beat Brighton, only for dem to be denied a place in Europe by Tottenham win against Leicester.
A strong finish to di season move di Gunners within one point of dia north London rivals as dem head to di final day, and with Arsenal cruise afta Pepe double, di 10,000 fans wey return to Emirates Stadium bin tink say dem dey set to snatch seventh place from Spurs.
Despite say dem finish di season with a fifth straight win, Arsenal finish ontop eight-place as Tottenham gbab 4-2 victory for di King Power Stadium.
Dat result end the Gunners record of playing in Europe every season since 1995-96 and mean say dem never finish above Tottenham since 2016.
Meanwhile West Ham collect sixth place for di Premier League – and spot in next season Europa League group stage – afta dem comfortably beat Southampton in front of 10,000 supporters for London Stadium.
