Di National Examination Council (Neco) don release di 2024 Senior School Certificate Examination result.
Di council release di result afta dem conduct di examination in June.
Registrar of di examination join bodi, Professor Dantano Wushishi announce di informate on Thursday, 19 September for inside statement.
One Neco official tell BBC News Pidgin say di website to check result don dey ready and candidates go soon begin access am.
Tori be say many students wey dey awaiting result, fit don miss out of getting admission into di university dis year becos di result no quick come out.
Most universities don already close dia admission portal.
How candidates perform
For di breakdown of how di candidates take perform dis year, di Neco registrar say 1,376,436 candidates bin sit for di examination.
Out of dat number, 828,284 candidates get credit for English Language and Mathematics. Dis represent 60.55% of di candidates wey sit for di 2024 Senior Secondary School Certificate (SSCE) internal examination, Prof Wushishi tok.
Oda breakdown of di result show say 1,147, 597 wey account for 83.9% of di candidates wey write di examination get five credits and above, irrespective of English Language and Mathematics, while dos wit special needs tanda for 2,267.
“Di 2024 Senior School Certificate Examination (SSCE) bin hold from Wednesday 19th June to Friday 26th July, 2024, while di Marking Exercise start from Monday 19th August to Sunday 8th September, 2024.
“Today make am 55 days afta dem write di last paper, wey show say all di process wey lead to di to di successful release of di 2024 SSCE Internal results don dey concluded,” e tok.
Di examination join bodi say di number of candidates wey dey involve for examination malpractice reduce dis year. According to di council, dem record 8,437 cases wey account for 30.1%, against di 12,030 dem bin record for 2023.
Di registrar also reveal say Abia, Imo and Ebonyi states bin get di highest results dis year, while di lowest performing states na Katsina, Kano, Jigawa, Borno and Zamfara.
How to check di result
One statement on dia website also announce say na “result checker token” candidates go use check dis year neco result.
Di council explain say na five times candidates go fit use di token bifor e expire. “Dis one mean say you no go fit use anoda token to check di same result again.” Neco add.
NECO clear am say afta di candidate don use di token for five times, if dem need to check di same result again, dem go need use NECO E-verify result verification Portal to verify or confam such result.
- NECO don release 2021 SSCE exam result
- WAEC release May/June 2024 WASSCE results, tell candidates how to check am
- WAEC, NECO, Jamb and problem of underage admissions – wetin be di right age to enta school for Nigeria?
