Di Investigative Panel wey di Minister of Interior Olubunmi Tunji-Ojo bin set up to torchlight di allegations on weda Nigeria socialite Idris Okuneye wey pipo sabi as Bobrisky serve im jail term sentence for prison or not don submit di outcome of dia investigation.
Di panel wey di Permanent Secretary of di Ministry of Interior, Magdalena Ajani head say dem no see any evidence thus far wey suggest say Mr. Idris Okuneye bin sleep outside di Custodial Centre during di period of im imprisonment.
However, dem see say Bobrisky enjoy plenty privileges wen e dey for custody both for di Medium-Security and di Maximum-Security Custodial Centers.
Di privileges include “specially furnished single cells, humidifier, plenty visitation by im family members and friends as e wish, family members and friends dey visit am well-well for inside di office of di pesin in-charge of di custodial center, floor rug, self-feeding, e get inmate wey dey help am run errands, e get access to fridge and television, and possibly access to im phone.”
- Ministry of Interior order investigation into Bobrisky alleged jail term outside prison
- Bobrisky allege bribery audio, alarm wey Very dark blackman blow dey legal?
- Wetin happun as Verydarkblackman table Bobrisky, EFCC mata bifor National Assembly
Di investigative panel findings
Na on di 30th of September 2024 di minister bin set up one five pesin team to carry out investigation into di allegations of bribery and corruption within Nigerian Correctional Service (NCoS).
On 21 October, di investigative panel release wetin dem say na a 1st phase interim report wey focus on dia findings on if Bobrisky serve im jail sentence for di Kirikiri correctional centre or not.
Di panel say dem use different method to carry out di investigation wey include; visits to di key correctional facilities; interviews wit correctional officers, inmates, and administrators; interviews wit alleged victims of di corrupt practices and oda interested parties (where possible); plus di review of documents, records and files.
Dem say dem no find any evidence wey suggest say Bobrisky sleep outside di prison during di period of im imprisonment wey be from 12 April to 5 August, wey be six months correctional sentence wit di usual 1/3 remission.
“During dis period, dem transfer am from Ikoyi prison to Medium Security prison Kirikiri on 12 April 2024, and on 22 April dem transfer am from di Medium Security prison go di Maximum-Security Custodial Center from where dem discharge am afta e complete im sentence on 5 August 2024.”
But di panel say di transfer of Bobrisky from medium prison to maximum prison as a first offender, violate section 16(4)(a) and (b) of di Nigerian Correctional Service 2019.
Dem also add say proper documentation no back up di transfer of Bobrisky from one prison to di oda.
“Di State Controllers of Corrections get di power by law to transfer inmate from one custodial center to anoda within di same state.
“But dem no do proper documentation of Okuneye Idris bifor dem transfer am from Ikoyi Custodial Centre to Medium Custodial Centre, and from Medium Custodial Center Kirikiri Apapa Lagos to di Maximum Custodial Centre Kirikiri Apapa.
“Dem later backdate di documents on 28 September go 12th of April and 22nd April respectively. Dis na violations of section 68 and 169 of di Nigerian Correctional Service Standing Order Custodial.” Di panel tok.
Di panel say dem also discover say Bobrisky enjoy plenty privileges wen e dey for custody, both for di medium and maximum prison for Kirikiri.
Dem say e get “specially furnished single cells, humidifier, lots of visitation by im family members and friends as e like, visits by im family members and friends dey hold inside di office of di pesin in-charge of di custodial center, floor rug, e get access to food, e get inmate wey dey help am run errands, e get access to fridge and television, and possibly access to im phone.”
Di panel say e dey necessary to further investigate if di above privileges dem provide for Bobrisky bin dey financially motivated and if na based on corrupt practices by correctional officers.
For dis particular case, di panel say dem believe say Bobrisky physical look and im behaviour fit be reason why e get such privileges, as no laid down rules dey on how to handle such case.
Dem recommend di need to set up clear guidelines wey go tok how to handle dis kain case in di future.
“Steps suppose dey to take avoid di obvious discriminatory practices in relation to di socio-economic levels and oda status of inmates,” di panel add.
How di mata take start
Di investigation bin come afta social media influencer Martins Otse, alias Very Dark Man (VDM) for one video wey don circulate on social media bin play audio recording wey involve two pipo.
E claim say na Bobrisky and one pesin bin dey engage in conversation.
For di audio recording, di voice wey Very Dark Man claim say na Bobrisky own tell di oda pesin on di phone say im pay 15 million naira to unnamed EFCC officers to avoid prosecution for alleged money laundering.
Di voice also claim say di oga of prison service help am avoid spending jail term for prison, and instead na for one apartment wey close to di prison im bin dey.
Di mata bin cause plenty katakata for di country, as pipo question if e dey possible make pesin wey court sentence to prison no actually dey di prison but fit stay outside di prison in as much as e get money to bribe prison officials.
Sake of dat di Oga Olubunmi Tunji-Ojo say make di investigative panel torchlight di mata wey come spread to include di following:
- Investigate allegations of corruption, torture, cruel, inhumane, and degrading treatment of inmates by correctional officers; examine violations of laid down rules and regulations wey dey govern di conduct of correctional officers plus di treatment of inmates.
- Identify wetin dey stop effective implementation of di Nigerian Correctional Service Act, 2019.
- Identify activities and processes within di correctional system wey fit encourage corruption, poor treatment and welfare of inmates and staff, and human rights violations.
- Provide strategic recommendations for promoting correctional best practices wey go align wit di international standards and;
- Undertake any oda task(s) wey di minister say make dem do.
- Bobrisky sentenced to jail – which prison dem go keep am?
- Court convict Bobrisky afta im plead guilty to naira abuse
- Falz give Bobrisky deadline afta Court order Very Dark Man
