High Court for Kenya don temporarily suspend di Senate decision to remove Deputy President Rigathi Gachagua from office.
Dis dey come just after lawmakers bin approve President William Ruto nomination of di interior minister as di new deputy president.
Di court temporarily block di replacement of Rigathi Gachagua until e hear di case on October 24 by a bench wey go dey appointed by di Chief Justice.
Mr Gachagua, through im lawyer, dey question why parliament dey hurry to replace am.
President William Ruto bin quickly nominate Interior Minister Professor Kithure Kindiki as di new deputy president, and 236 lawmakers approved am inside a roll-call vote.
Di law bin give di president 14 days to nominate a replacement and a further 60 days for a vote by lawmakers.
So far, four petitions don dey filed for court to stop Mr Gachagua replacement.
Kenyan senators bin vote to remove Deputy President Rigathi Gachagua from office despite im failure to testify for im impeachment trial afta im lawyer tok say im sick and dey for hospital.
For one of di most dramatic days for Kenya recent political history, Gachagua suppose appear for Senate afta lunch to defend imsef, a day afta im bin plead not guilty to 11 charges.
Gachagua bin no show up and im lawyer request a postponement and tok say im client bin dey suffer from chest pains and dey receive treatment from doctors at The Karen Hospital.
Senators bin continue di trial witout am, prompting di defence team to leave di chamber.
On Thursday evening, di required two-thirds of di 67 senators bin vote to impeach am on charges wey included corruption, inciting ethnic divisions and undermining di goment.
As di trial bin start on Wednesday, di deputy president bin plead not guilty to each of di 11 charges as dem read am out for di house.
Majority of di lawmakers for di National Assembly last week bin vote to approve im impeachment, to set di stage for di Senate trial.
E fall out wit President William Ruto, just two years afta dem elect dem on joint ticket.
Di palava become worse for June wen Gachagua, for act wey dem see as undermining di president, blame di head of di intelligence agency say dem no properly brief Ruto and di goment over how big di mass protests against unpopular tax hikes dey.
Who be Kithure Kindiki ?
Before Ruto announce am, e be di interior minister.
52-year-old Kindigi na strong ally of di president and bin serve as im lawyer during im trial for crimes against humanity for di International Criminal Court (ICC) wey dem eventually dismiss because of a lack of evidence.
Prof. Kindiki get im Bachelors degree in Law (LLB) from Moi University and a Diploma in Legal Studies from di Kenya School of Law.
E also get Masters degree in International Human Rights Law & Democracy and PhD in International Law, both from di University of Pretoria, South Africa.
Prof. Kindiki bin also lecture for di Moi University. E also serve as a Senior Lecturer and di Head of di Department of Public Law for di University of Nairobi.
E rise to be Associate Dean for di School of Law in di same institution.
E also serve as di Secretary of National Cohesion under President Mwai Kibaki.
Prof. Kindiki na di immediate former Senator, Tharaka-Nithi County.
Dem first elect am for 2013 and dem re-elect am in 2017.
E be di Senate majority leader during di 2013–2017 term and di deputy speaker of di Senate from August 2017 to 2020.
Asides im experience in politics, Prof. Kindiki bin don also consult for local and international organisations including United Nations High Commissioner for Refugees (UNHCR) and United Nations Development Program (UNDP) among others.
E be a member International Commission of Jurists, Kenya Chapter (ICJ-K).
- Kenya Senate begin debate on Deputy President Rigathi Gachagua impeachment
- Lawmakers impeach Kenya deputy president as im dey hospital
- ‘Im bin think of himself as king’: Di party dem wey lead to P Diddy downfall
