Authorities for di Niger Delta region don ask youth wey neva pass 45 years old to register for one NDDC special training programme wia dem go acquire skill.
Na ova 10,000 youths according to di Niger Delta Development Commission (NDDC) go benefit for di programme wia dem go also gbab entrepreneurship skills.
Chairpesin of di NDDC board, Chiedu Ebie, tok wen dem inaugurate di Scheme for Port Harcourt on Monday 5 August say di commission commit to carry out President Tinubu Renewed Hope Agenda wey go impact youths dem.
On Wednesday 31 July, Senate President, Godswill Akpabio, bin yarn say di federal goment don approve 50,000 naira monthly stipend to 10,000 Niger Delta youths for 12 months.
According to Oga Ebie, di Youth Internship Scheme go prepare 10,000 pipo across di Niger Delta region wit di training and experience wey dem need for gainful employment and self-employment through entrepreneurship.
- How FG plan to share 50,000 naira to help 100,000 homes for states across Nigeria?
- Wetin be dis consumer credit scheme wey Tinubu launch and how you go fit benefit
- Tins you need sabi about di student loan scheme wey Tinubu say go begin for January 2024
Who di 10,000 youths go be and how dem go access di proprogramme?
Youths for area of technology, arts, music and odas dey among dose wey go benefit for di internship scheme.
Chairmo, Chiedu Ebie explain say di scheme go accommodate young pipo across different levels of education and experience, e note say “but make dem no pass 45 years”.
NDDC Managing Director, Dr Samuel Ogbuku, say di entrepreneurial and skills enhancement na ogbonge tins wey need to unlock potentials of di youths for di Niger Delta region.
E add say di aim na to get di youths to gbab meaningful and self-sustaining skills wey go improve dia lives, support dia families and communities and make sure say peace dey di Niger Delta region.
Ogbuku tok say dem carefully tink out di Internship Scheme and oda youth programmes of di NDDC and include am for di Commission 2024 budget.
“No be reaction to di protests for oda parts of di kontri,” Oga Ogbuku add.
“Di scheme go also develop metrics for im impact on di economy of di Niger Delta region. Admission to di scheme go dey highly competitive and go dey driven by merit. Applicants go dey required to include personal statement for dia application to reflect dia commitment to meet di objectives of di programme and contribute to di socio-economic development of di region.”
Ogbuku observe say di scheme go empower di benefitting youths for areas of technology, music and arts, agriculture and marine, among odas.
E add say during di 12-month period of di internship, each intern go receive stipend of 50,000 naira per month.
E urge dose wey go benefit from di programme to show good example for future beneficiaries, “di registration go be exclusively online”, dem add.
“All di nine NDDC states go get 500 slots bifor di application of di oil production quota for di remaining slots.”
NDDC Executive Director, Projects, Sir Victor Antai, tok say to place youths on internship roles go allow dem improve dia technical skills and acquire practical experience wey go make dem self-reliant.
E further explain say “Each applicant go dey encouraged to identify one specific place of internship while di scheme go match dem to prospective businesses wey go help dem enhance dia skills.
“We mark one ogbonge milestone for our ongoing quest for progress and prosperity for di Niger Delta region.
Antai say di NDDC Youth Internship Scheme no be just financial intervention, “na symbol of our commitment to nurture and empower di next generation”.
E urge all beneficiaries “to seize dis opportunity wit both hands and use am to fuel dia passion to learn, to groom, and give back to our communities”.
- Experts tok how CBN new dollar rate go take affect di economy
- Why di ‘hunger protests’ turn violent for northern Nigeria?
- Wetin Google monopoly ruling mean for you?
