Hosts Germany reach Euro 2024 quarterfinals afta dem beat Denmark 2-0 for Dortmund on Saturday.
Second half goals by Kai Havertz spotkick and Musiala cool finish see di Germans weather di storm of di Danes and di weather conditions on di night and seal qualification.
Germany show dia intent afta taking di lead inside di fourth minute through Nico Schlotterbeck, e celebration no last long as di Video Assistant Referee cancel di goal for foul.
Di match bin temporarily dey suspended due to bad weather, but play later resume in di 35th minute.
Minutes afta di restart, Joachim Andersen tink say e don open di scoring for Denmark but VAR rule am out for offside.
Di game come be like bad dream for Andersen as e later concede penalty afta e handle di ball inside di box on 52 minutes. Havertz cooly dispatch e spotkick beyond di reach of Schmeichel to open di scoring dis time for Germany.
Musiala den seal di victory for Die Mannschaft on 68 minutes as e pounce on Schlotterbeck over di top pass before e curl e shot beyond di reach of Schmeichel.
Victory for Germany no only eliminate di Danes but e also ensure say Denmark no win any of dia four matches for dis tournament. Dem bin draw dia three group games.
Germany go meet di winner between Spain and Georgia for di quarter-final
Second half
Full Time – Germany 2-0 Denmark.
90+4 mins – Havertz go clean through on goal, e waya left foot shot wey Schmeichel save wit im leg.
90+1 mins – Fullkrug tink say e don score Germany third goal, but VAR say offside.
89 mins – Fullkrug test Schmeichel wit a shot wey im save well.
87 mins – Waldemar Anton don come on for Germany final change, e replace Sane.
85 mins – Kristiansen don replace Bah for Denmark.
83 mins – Fullkrug tink say e don get opportunity to score, even though Schmeichel save e shot di flag later go up for offside.
81 mins – Substitutions now.
Denmark take off Bah, Christensen and Hojlund and send on Wind, Bruun Larsen and Damsgaard.
Germany bring on Wirtz and Henrichs for Musiala and Raum
76 mins – Denmark get opportunity to reduce di difference from a corner, Eriksen cross hit Rudiger go out for anoda corner. Di German defenders clear di ball from Eriksen second cornerkick.
69 mins – Substitutions for Demark. Poulsen and Norgaard don take di place of Skov Olsen and Delaney.
69 mins – Di Bayern Munich prodigy pounce on Schlotterbeck long ball over di top before e curl im shot beyond Schmeichel. Sweet goal.
68 mins – Musiala extend Germany lead!
Germany 2-0 Denmark
66 mins – Hojlund test Neuer wit a first time shot, di goalkeeper manage to save am.
65 mins – Substitution for Germany: Gundogan and Andrich off, Can and Fullkrug ON.
64 mins – Havertz try to mark e run, di Arsenal player den break as im enter di box. E pass to Musiala wey shoot e shot first time go over. Di flag later go up for offside by Kai Havertz.
60 mins – Yellow card for Joakim Maehle for foul.
59 mins – Havertz beautiful skill put am clean through on goal one on one wit Schmeichel, di forward chip di ball go wide. See miss!
57 mins – Yellow card for Andersen.
53 mins – Goal for Germany! Schmeichel follow di ball but Havertz sidefoot am wit accuracy into di net.
Germany 1-0 Denmark
52 mins – Penalty for Germany. Afta di VAR check di ref don give di hosts penalty.
50 mins – Now di ref don stop di game to check if Andersen handle di ball inside di net. From scoring for Denmark to possibly concede penalty?
48 mins – Joachim Andersen give Denmark di lead!
O, oh, di referee say di goal no go stand as Andersen bin dey offside.
Germany 0-0 Denmark
46 mins – Denmark don restart play through Christian Eriksen.
First Half
Half Time – Germany 0-0 Denmark.
45 mins – What a chance for Denmark! Good passing move from di Danes see Delaney break free, e pass to Hojlund wey try to chip Neuer but di goalkeeper save am.
42 mins – Rasmus Hojlund pounce on loose ball inside Germany box, come fire shot into di side netting.
40 mins – Kasper Hjulmand, di Denmark coach don collect yellow card from di referee.
37 mins – Havertz come close to scoring for Germany but Schmeichel spread imsef well to deny di Arsenal man.
36 mins – Play don resume as di rain don stop for now.
20: 56: Players don return to di pitch as di match dey set to resume. Di match go resume wit dropball from di 35th minute.
20:45: Di match don dey suspended due to bad weather conditions. E dey rain heavily for Dortmund and di rain come wit strong lightning.
E no dey clear wen di match go resume but fans inside di BVC stadion no send di rain as dem dey sing, dance and enjoy demsefs.
35 mins – Referee Oliver don signal say di game need stop becos of lightening strike.
30 mins – Robert Andrich foul Olsen for just outside Germany penalty area.
Eriksen na im wan take di freekick…di Man United midfielder strike di ball into di wall.
24 mins – Maehle left-foot shot from just inside Germany box no trouble Neuer as e go wide for goalkick.
20 mins – Andersen long pass from back find Eriksen, di playmaker try to create space for imsef but Rudiger put body block im eventual shot.
16 mins – Germany dey play Denmark halve field as di hosts camp inside di Danes half.
10 mins – Again Schmeichel brilliant save ensure say di tie dey goalless. Di goalkeeper palm clear Havertz volley go out for corner.
Andrich header from Kroos corner go straight into di goalkeeper hands. Good start to di game by Germany.
6 mins – Schmeichel dive well to stop Kimmich hot shot from outside di box, corner for Germany.
Di goalkeeper also later deny Schlotterbeck from scoring as im push im header out.
4 mins – Goal for Germany by Nico Schlotterbeck?
Di defender rise high to head Kroos cross from corner into di net but…VAR don cancel di goal. Referee Michael Oliver blow im whistle for foul on Schmeichel.
1 min – Sane of Germany kick don signal di start of dis round of 16 tie.
Di second round of 16 fixtures dey about to start as hosts Germany take on Denmark.
Germany vs Denmark lineup
Germany XI: Neuer, Kimmich, Rudiger, Schlotterbeck, Raum; Andrich, Kroos, Musiala, Gundogan, Sane; Havertz.
Denmark XI: Schmeichel, Andersen, Christensen, Vestergaard; Bah, Hojbjerg, Delaney, Maehle, Eriksen; Hojlund, Skov Olsen.
Match stats
- Dis go be di fifth meeting between Germany and Denmark for major tournament (World Cup/Euros), both sides get two wins each for di previous four. Di only previous knockout stage tie between di two nations na for di final of Euro 1992, wia Denmark win 2-0.
- Three of di last four meetings between Germany and Denmark for all competitions end for draw (Germany bin win for Euro 2012, 2-1).
- Denmark don lose all five of dia previous European Championship matches against host nations, including one against Germany for 1988 group stage. Dem bin chop elimination from hosts England for Wembley for semi-final of di last Euros (2-1).
- Germany don reach di Euros knockout stages for a fifth consecutive tournament. Dia last two knockout matches bin end for 2-0 defeats, to France for Euro 2016 semi-final and England for Euro 2020 last 16.
- Belgium use goal difference escape removal from Euro 2024
- Portugal sama Turkey 0-3 to move ahead for dia Euro 2024 campaign
- NPFL find Enyimba guilty of causing katakata against Rangers, sama dem wit N10m
