More dan 50 pipo don die for Ethiopia northern Tigray and Amhara regions for middle of drought and one aid freeze, local officials tell BBC.
Di Horn of Africa don get five failed rainy seasons since 2019, according to di UN.
Di US and UN bin suspend aid for early dis year afta allegations of theft, wey make di humanitarian crisis worse.
Tigray dey recover from one two-year civil war wey bin end one year ago, while gbege bin burst for Amhara.
About 46 pipo don die for di town of Yechila for Tigray, while six don die for di neighbouring Amhara region of Wag Hemra, sake of food shortages, di officials bin tok.
Ova 4,000 cattle don die sake of severe drought.
As northern Ethiopia dey battle drought, di kontri southern and eastern regions don dey full wit flash floods.
For one statement on X, wey im former name be Twitter, di UN say more dan 370,000 pipo don run comot from dia homes sake of di floods.
At least 43 pipo don die sake of di flooding and landslides for di eastern Somali region.
During di war for Tigray, di region bin dey cut off from humanitarian aid, wey lead to deaths wey di number no dey known. But dem estimate am say about 500,000 pipo fit don die sake of di war, lack of medical supplies and hunger for wetin dem describe as “famine-like conditions”.
Di conflict end afta di Ethiopian goment and di Tigray Pipo Liberation Front (TPLF) sign one peace deal wey di African Union (AU) broker.
Afta di conflict end, e bin steady flow of aid until June, wen di US and UN bin pause humanitarian assistance, dem say corrupt officials don take style tiff di programme.
Di US say widespread food deliveries go resume for December afta ogbonge reforms don dey to make sure say di supplies reach dose wey need am most.
Across East Africa, heavy rains and flash flooding don kill 130 pipo for Ethiopia, Kenya and Somalia for recent weeks, according to di Associated Press.
Di UN don describe dem as “once-in-century event”.
For one statement, Fati N’Zi-Hassane, Oxfam for Africa Director tok say, di region dey “go from one disaster to di next as climatic shocks don become more plenti and intense”.
Di floods hit Somalia afta dem suffer from terrible droughts for recent years. Di worst hit town na Beledweyne, wia di Shabelle River burst im banks.
Di El Nino phenomenon don greatly affect East Africa. Na warming for di Pacific Ocean cause am and link to flooding, cyclones, drought and wildfires.
No be all droughts or floods be sake of climate change, but too much heat for di atmosphere dey draw more moisture out of di earth and make di droughts worse, while one warming atmosphere wey climate change cause make plenti rainfall dey more likely.
Di world don already warm by about 1.2C since di industrial era begin and temperatures go kontinu to rise unless goments around di world make sharp cuts to emissions.
