Nigeria lawmakers don vote in new leaders to lead di 10th National Assembly.
Senators elect vote in Godswill Akpabio as di president of di 10th Senate. Akpabio score 63 to beat im closest rival Abdulaziz Yari wey score 46 votes.
Meanwhile, dem declare Barau Jibrin as deputy senate president unopposed.
For di House of Representatives, Tajudeen Abbas don emerge speaker of di House of Reps for di 10th Assembly with 353 votes.
While Benjamin Okezie Kalu emerge unopposed as di deputy speaker of di House of Representatives.
Prior to di day, tori be say President Bola Tinubu bin mobilise to support Senator Godswill Akpabio to win.
Tori be say di president endorse Godswill Akpabio and Barau Jibrin as Senate President and Deputy Senate President. While for di House, Tajudeen Abbas and Ben Kalu na im get di approval tp be di 10th House as speaker and deputy.
Even though President Tinubu, oda lawmakers and even some govnors bin throw dia weight behind Godswill Akpabio and Barau Jibrin as Senate President and Deputy Senate President. While for di House, dem support Tajudeen Abbas and Ben Kalu, no be everybody bin follow suit.
Di former Zamfara State Governor, Senator Abdulaziz Yari, bin go ahead wit im senate presidential ambition on Monday.
Di current Chief Whip, Orji Uzor Kalu, from Abia state bin indicate interest but e later step down.
Dem also swear in di lawmakers-elect wey be 109 Senators-elect and 360 Members-elect to mark di inauguration of di 10th Assembly.
Akpabio profile (Senate President)
Dem born am for 9 December 1962.
E complete im primary education for Methodist Primary School, Ukana, and from dia e go Federal Government College, Port Harcourt, Rivers State for im O’ and A’ levels certificate.
E study Law for University of Calabar and attend Nigeria Law School for Lagos
E do work as teacher and for small time, practice for Paul Usoro and Co. wey be law company
E work for EMIS Telecoms Limited wia im become company Managing Director
For 2002, dem appoint am Commissioner for Petroleum and Natural Resources
E become Akwa Ibom State Govnor under Peoples Democratic Party (PDP) ticket for 2007. E enta again for second time for 2011
E become Chairman PDP Governors Forum for 2013.
E win Senatorial seats of di Akwa Ibom North West Senatorial District (Ikot Ekpene) for 2015.
For 2015 also e become di Senate Minority Leader
Na for August 2018 Akpabio resign as Senate Minority Leader and port to di All Progressive Congress, APC.
For July 2019, President Muhammadu Buhari nominate am for Minister for Niger Delta Affairs. Senate confam am di following month for August 2019
For 2019, di Economic and Financial Crimes Commission (EFCC) bin investigate oga Akpabio ontop alleged N100 billion (N258 million) fraud during im 2007 to 2015 time as govnor, although di corruption police no file any criminal charge las las.
Jibrin Barau profile (Deputy Senate President)
Jibrin Barau na native of Kabo Township, Kabo Local Goment Area, Kano State, wey dem born for 1959.
E get bachelor’s degree in accounting, master’s certificate in Financial Management and pricing, master’s certificate in Management and Masters of business Administration (MBA).
E also get certificate in Financial Management for business decisions from Cornell University, United States.
Di senator work briefly for di accounting department of Kano State Foundation, before e resign for 1992 to begin im private business wey get interests in manufacturing, insurance and construction sectors.
Barau first contest election for 1999 to House of Representatives to represent Tarauni Federal Constituency of Kano State and e win.
For di House of Representatives, e serve as Chairman, House Committee on Appropriations and a member of di House Committee on Power during dat period.
Afta im tenure for di House of Representatives, Barau serve as Chairman Kano State Investment and Properties Ltd; one time Commissioner of Science and Technology Kano State.
For 2001, e serve as a member of a committee set up by former President Olusegun Obasanjo to review Nigeria Budgetary process.
For 2009, e serve as a member of Kano State Business Incentive Committee.
Barau return to electoral contest in 2015 wia e contest and win di senatorial election for Kano North Senatorial District under di All Progressives Congress, and e serve as Vice – Chairman Committee on Petroleum Resources (Downstream). Later e become Chairman of di same Committee.
For di later part of 2016, dem reassign am to Senate Committee on Tertiary Institutions and TETfund as Chairman of di Committee.
E also be a member of di Committee on Niger Delta, Industries, Land Transportation and Appropriations and Secretary of Northern Senators Forum.
On 3 October, 2019, Sen Barau sponsor a bill for di establishment of Federal Polytechnic Kabo.
For October 2022, President Muhammadu Buhari give am national honour of Commander Of The Order Of The Niger (CON).
Tajudeen Abbas (Speaker House of Representatives)
Na for October 1963 dem born Tajudeen Abbas for Zaria, Kaduna State, Nigeria.
Hon. Dr Tajudeen Abbas na educationist and politician and e dey represent Zaria federal constituency for Kaduna State, Northern Nigeria.
E attend Kaduna Teachers College (KTC) wia e get Teachers Grade II certificate for 1981. Afta dat, e go Ahmadu Bello University, Zaria and study Business Administration and graduate for 1988.
Later, e obtain Masters degree in business administration from di same institution for 1993. E further im education to doctorate degree in business management from Usman Dan-Fodio University, Sokoto in 2010.
Dr Tajudeen Abbas career start as primary school teacher from 1981 to 1988 before e move to become lecturer for Kaduna State Polytechnic in 1989.
For 1993, e join Kaduna State University (KASU) as a lecturer till 2001. From 2001 to 2005, Dr. Tajudeen Abbas work as a marketing manager for NTC Plc.
For 2011 Dr. Abbas join politics and election to di House of Representatives to represent Zaria Federal Constituency, Kaduna State on di platform of di All Progressives Congress. E return again to di Green Chambers for 2015 to 2019 and again for 2023.
For di Green Chambers, Dr. Tajudeen Abbas don serve as Vice Chairman at Legislative Compliance Committee and dey many committees including National Planning and Economic Development, Public Procurement, Defence, Social Duties, Finance and Commerce.
Benjamin Kalu (Deputy Speaker, House of Representatives)
Benjamin Kalu wey dey represent Bende Federal Constituency for Abia State bin be di tok tok pesin for di Green Chambers as well as di Chairman House Committee on Media and Public Affairs.
Born on 5th May, 1971, Benjamin Okezie Kalu graduate from University of Calabar, wia e serve as a student representative. E also don serve for di national chapter of PDP in diaspora.
Benjamin Kalu also be di youngest local goment chairman of Bende, Abia State, at di age of thirty one. Later, e become senior special adviser to den govnor of Abia State Orji Uzor Kalu on local goment and chieftaincy affairs, before e become di senior special adviser to di govnor on Millennium Development Goals and international relations.
For 2002, Kalu contest di House of Representatives primaries but lose to Mbah Ajah.
For 2011 and 2015, e contest di House of Representatives election under Progressive Peoples Alliance but lost. For 23 February 2019, e finally win di seat under di ruling All Progressives Congress and defeat Chima Anyaso of di Peoples Democratic Party to represent Bende federal constituency, Abia State.
E don serve two tenures for di Green chamber.
