Connie Chiume, one ogbonge South African actor wey appear for Marvel film Black Panther, don die at di age of 72, her family don announce.
Di multi-award-winning actress act for several South African TV shows including Rhythm City, Zone 14 and most recently, Gomora.
Chiume be trained teacher but later become a household name on mainstream television.
She die for one Johannesburg hospital on Tuesday afternoon, one short family statement tok.
“The Chiume family regret to inform you of di passing of di internationally acclaimed award-winning actress Connie Chiume,” di statement tok.
Di family ask for privacy during dis difficult period and say dem go communicate further details later.
Her son Nongelo Chiume tell TV broadcaster Newzroom Afrika say dem admit am for a “medical procedure” before her death.
Chiume show for South African TV for decades for shows such as Rhythm City, with di kontri public broadcaster SABC News wey describe her as a “beacon of hope” for dia tribute.
She become popular as an actress for 1989 wen she appear for di popular South African television series Inkom’ Edla Yodwa.
For di 2018 Black Panther film, Chiume act as Zawavari – a member of di Wakandan Tribal Council. For di 2022 sequel Black Panther: Wakanda Forever she replace Zuri (Forest Whitaker) as Wakanda Elder Statesman.
She also bin dey highly celebrated for her appearances for Beyoncé Disney musical film based on The Lion King, wia she play Simba mama, Sarabi.
Her most recent role na for Heart of the Hunter, wey dem release earlier dis year, and she also appear for TV series Soon Comes Night for February.
Chiume collect several awards, including one NTVA Avanti Award for Best Actress in a Drama Series for her role inside Soul City for 2000.
Later for 2009, she received one South African Film and Television Award (SAFTA) for Best Supporting Actress inside a Drama for her role as Stella Moloi for di family drama Zone 14.
Dem born am for Welkom, for Free State province, to a Malawian father and a Zulu mother. She train as a nurse but end up as a teacher.
For 2022, she tell di MacG Podcast say she go like for pipo to remember her di way dem choose to.
“I don impact each and every pesin in a different way. Whatever way I don impact you, remember me dat way.”
Tributes don come in for social media with some of her fans wey describe her as a versatile actress wey play plenty roles for di South African television industry.
“Her outstanding work go always dey remembered,” di South African government post for X.
She leave behind four children – two sons and two daughters.
- Miss South Africa organisers respond to critics about Chidimma Adetshina qualification to contest
- Wetin be di implication of waving Russian flag for Nigeria?
- Di small African kontri with di highest suicide rate for di world
