Di Federal Airports Authority of Nigeria (FAAN) don react afta one of di major airline for Nigeria Arik Airline go stop to fly for now sake of debts wey dem owe.
Arik Air na privately Nigerian owned commercial airline wey dey fly different routes for di kontri.
Dis na as di Nigerian Airspace Management Agency (NAMA) bin stop aircraft of Arik Airline from flying sake of legal actions against dem.
Wetin happun be say di FCT High Court bin enforce one order wey di court bin make ontop one debt of $2.5 million wey Arik Airline dey owe one Atlas Petroleum International Ltd.
According to FAAN, di issue na between Arik Airline and dia creditor and di action go affect passengers wey don already book flight.
“Dis na to inform di public say di Federal Airports Authority of Nigeria (FAAN) dey aware say Arik Airline don dey stopped from flying sake of legal issues between di airline and dia creditors.”
- Airlines strike in Nigeria update: Ibom air, Green Africa Airlines, Arik Air, Dana Air, odas go continue flight schedules as operators suspend action
- Airbus A380: Meet di plane wey dey use cooking oil to fly
- Bayelsa airport get NCAA licence, wen flight go resume, destinations to/from Yenagoa
Di serious gbege now na how passengers wey don book flight for di ariline go take sort diasef sake of di new development. Di airport authority say Arik go need to find how dem go work to transfer passengers go oda flights wey dey available.
FAAN through dia Director of Public Affairs and Consumer Protection, Mrs Obiageli Orah say, di “authority don ask all airport managers across di kontri to assist di affected passengers as Arik Airline go work out plans on how dem go rebook and transfer passengers to oda available flights.”
Wetin Arik Air tok
Arik Airline don issue information give dia passengers wey don book flights say all di flights don dey cancelled.
Di airline say di cancellation na sake of di directives wey stop di aircraft from flying.
“Due to di ministerial directive wey stop our aircraft from flying, all our flight operations for today don dey cancelled,” di airline tok for dia website.
For 2017, Ethiopian Airlines wey be one of di biggest airline for Africa, bin declare say dem go like to take ova Arik Air and one oda airline for Nigeria..
Dat time, Nigerian goment say Arik Air dey broke and no get money to do business and dem want oda pipo to manage.
Esayas Weldamariam, wey be di director of International Service for Ethiopian Airlines Group dat time bin say dem ready and dey capable to make sure say Arik Air dey successful.
For February 2017, Arik Air also enter news after dem no fit pay di salary of dia workers. Nigerian goment bin take ova di company dat time.
- United Arab Emirates tok how pipo fit apply for dia visa as dem deny ownership of some websites
- Nigerians fit obtain UAE visa from July 15 with conditions – Minister
- ‘I sleep for borders two nights for Liberia’ – London to Lagos driver tok wetin she face for road
