Di European Championship dey always produce a match between two historic football nations and dis year tournament go see battle between Spain and Italy.
Spain and Italy go renew dia rivalry for dia second game in Group B as both teams dey look to shine for di competition.
Defending champions Italy don win di Euros two times, while Spain don win di competition for 1964, 2008 and 2012.
Di Group B game between Spain vs Italy go happun for Arena AufSchalke, Gelsenkirchen by 8pm WAT Thursday 20 June, 2024.
From Andreas Iniesta to Andrea Pirlo, Xavi to Jorginho, di two sides don boast of some of di best players wey dis generation don witness.
BBC Sport go down memory lane to bring back six of di best matches between dis footballing giants of di 21st Century.
Previous match between Spain and Italy
Euro 2020 semi-final – Italy 1-1 Spain, 4-2 on penalty (July 2021)
One of Italy stars of Euro 2020, Federico Chiesa, bin break di deadlock on di hour mark.
Substitute Alvaro Morata score for Spain to take di tie to extra time. Ultimately, di striker na di one wey take im spot-kick wey Gianluigi Donnarumma save to send Italy to di final.
Na one ogbonge significant moment for Italian football history as dem go on to break England heart and lift di European Championship trophy.
Euro 2016 – Italy 2-0 Spain (June 2016)
Antonio Conte side bin come into dis tie for Stade de France as dem lose to Spain for di previous two Euros.
Giorgio Chiellini and Graziano Pelle score for Italy to put an end to Spain eight-year reign as European champions.
Di Italians later lose to Germany for a penalty shootout for di quarter-final stage.
Euro 2012 final – Spain 4-0 Italy (July 2012)
Reigning European and world champions Spain bin dey unstoppable during Euro 2012 and Italy wan end dia reign.
E just take 14 minutes for David Silva to give Spain di lead for Kyiv bifor Jordi Alba double am.
Juan Mata and Fernando Torres secure di European crown wit di highest score in a Euros final.
Euro 2008 – Spain 0-0 Italy, 4-2 on penalty (June 2008)
Talent dey on display all ova di pitch but Xavi, Iniesta and Pirlo no fit make dia move for dis football game.
Spain come into di match as dem neva beat Italy for competitive game.
Luis Aragones side end di 74-year curse for a penalty shootout wen Iker Casillas save spot-kicks from Daniele de Rossi and Antonio di Natale bifor Cesc Fabregas send Spain to di semi-finals.
Euro 2024 full squad list of national teams
Euro 2024 table afta round two
Euro 2024: Who go be highest goal scorer for dis year tournament?
- Euro 2024 table afta round two
- Groups, full fixtures and favourites to win Euro 2024
- Messi beat Haaland, Mbappe, Osimhen and odas to win Ballon d’Or award 2023
