‘Na you be terrorist’ – Nnamdi Kanu para for goment Lawyer

Leader of di secessionist Indigenous People of Biafra (Ipob) Nnamdi Kanu para as im stand up to address di court.

Kanu begin para as e tok straight to di judge, e begin accuse goment lawyer Awomolo say im dey go against di provisions of di Terrorism Prevention Act.

“You be terrorist. You no get any power to try me. Di law tok am for section 23f of di terrorism prevention act say anybody try anybody against di provisions of di law or against any treaty wey Nigeria be signatory to, dat person na terrorist.”

“So you na terrorist you be. I don dey for detention now for three years, for wetin?” Kanu tell Awomolo.

Dis dey come afta Justice Binta Nyako of di Federal High Court Abuja reject di application to transfer Nnamdi Kanu to house arrest.

Justice Nyako tok say she don rule on di same application several times and she no go change her ruling – di ruling be say di DSS custody remain di safest place wia di accused person go dey.

“Any attempt to file dis application again, I go find am as abuse of court process. Di only option open to di defence na to take di matter on appeal,” Nyako tok.

Also, on di issue of whether Kanu jump bail, Nyako tok say she bin don also rule say Kanu jump bail.

Di court say she bin don order say Kanu sureties go forfeit di bail bond wey dem bin agree.

“Di only reason wey make dem neva forfeit di bail bond na becos dem appeal di decision. So bringing dis application bifor me again no dey necessary.

‘If e happen again, I go hold am as abuse of court process.” she tok.

However, Justice Nyako order say Kanu lawyers go fit dey visit dia client for DSS custody three times a week instead of two times.

She also order di DSS to provide Kanu a “clean room” wia im and im lawyers go hold consultation witout any monitoring or recording.

Afta di ruling, counsel to di federal goment, Adegboyega Awomolo (SAN) tell court say dem dey ready to call dia first witness, but Aloy Ejimakor wey be counsel to Kanu, ask di court to grant dem adjournment so dem go take advantage of dis latest ruling to prepare dia client for trial.

Ejimakor try to insist say di condition of detention dey very oppressive for Kanu, but Justice Nyako tell am to go on appeal.

Di matter between Nnamdi kanu, leader of di secessionist Indigenous People of Biafra (Ipob) and di Federal goment kontinu on Monday for di Federal High Court, Abuja.

Di case wey start around 12:00 (Nigerian time) dey bifor Justice Binta Nyako wey don dey in charge of di matter since goment first arraign Kanu in 2015.

Kanu dey face eight-count charge wey border on terrorism and belonging to a proscribed organisation bicos of im fight make di southeastern part of Nigeria pull away to become dia own kontri wey im name go be Biafra.

E dey important to note say since di Nigeria goment reaarest Kanu for Kenya in June 2021, im trial neva actually resume sake of di many complaints wey im lawyers dey make against di Department of State Services (DSS) wia Kanu currently dey detained.

Aloy Ejimakor, wey dey usually tok on behalf of Kanu, dey allege say im client neva dey ready for trial bicos di DSS no dey allow am and im oda lawyers to get “unhindered access”.

On di last adjourned date…

For di last hearing day in April, Ejimakor bin tell Justice Binta Nyako say dia visit to Kanu for di DSS cell na just for 30 minutes per counsel, and di DSS pipo no dey gree for two lawyers to see him at a time, dem no dey fit enta wit any writing materials to take notes, and dia conversations dey monitored all di time.

“We dey apply make our client dey transferred to home detention or house arrest,” Ejimakor bin beg di court dat day.

Di defence counsel make dis plea after Justice Nyako bin don refuse several times to transfer Kanu from DSS custody to Kuje correctional facility, as she tok say she no get confidence in di security of di facility.

E dey expected say Justice Nyako go rule on di application on whether to grant Kanu di house arrest wey im apply for.

Also, di federal goment dey expected to call dia first witness, wey go signify say trial don actually begin.

Justice Nyako bin threaten say if Kanu and im team neva dey ready for trial, she no go get any oda choice dan to adjourn di case “sine die”, until wen dem don ready.