Di appeal court don rule against di judgement of di election petition tribunal wey order rerun for di Eti-Osa federal constituency.
Di case na between Bankole Wellington wey dem know as Banky W from di Peoples Democratic Party (PDP), Babajide Obanikoro from di All Progressives Congress (APC) and Thaddeus Attah from Labour Party (LP).
Di court affirm Thaddeus Attah of di Labour Party as winner of di Eti-Osa Federal Constituency seat for House of Representatives.
Both Thaddues and Bank W no show for court.
Di judge rule say di petition tribunal dey wrong to order rerun sake of say some of di evidences and exhibits wey dem present for court no strong enough according to wetin di Electoral act 2022 tok.
Di judge add say some of di witnesses wey petitioners present no be pipo wey serve for di affected polling units.
On di mata say election no hold for some polling units, di judge tok say petitioners need to prove say election wey no hold truly affect di outcome of di results. E dismiss di issue.
Di judge deliver di judgement on Thursday for di appeal court wey sit for Tafawa Balewa square.
For September 2023, di National Assembly Election Petition Tribunal bin cancel di 25 February 2023 election wey declare Labour Party candidate, Thaddeus Attah as di winner of Eti Osa federal constituency.
For one interview wey Obanikoro of APC do wit BBC Pidgin, im tok say im dey ready to follow di case up if e reach appeal level before dem do di rerun.
Di tribunal wey siddon for Tafawa Balewa Square Lagos state on Monday, 11 September bin rule say di election dey inconclusive and order di Independent National Electoral Commission (Inec) to conduct a re-run election for 33 polling units wia election no hold within 90 days.
Di electoral umpire bin declare LP candidate Attah as di winner of di election as e secure 24,075 votes, to defeat Bankole Wellington – wey pipo sabi as Banky W – of di Peoples Democratic Party (PDP) wey score 18,666 votes and All Progressives Congress (APC) Ibrahim Obanikoro wey get 16,901 votes.
Following di outcome of di election, both di PDP and di APC candidates bin file petition to challenge di election result for di tribunal and di tribunal agree wit dem say election no hold for some polling units for Eti Osa local goment area.
Obanikoro congratulate Thaddeus Attah
Di APC candidate Obanikoro for im interview wit BBC Pidgin after di court judgement tok say di judge no too look into di case as expected.
“Many tins wey di judge read dey contrary to wetin happun for di lower court. Documents wey we tender na Inec get am, why court go tok say no be genuine document and wetin happun to di Inec witness as well. Di judge no tok about am.”
“Di judge dey lazy to go through all di documents wey dem present to am and im take di easy way out. Make NBA review all dis kain case becos e dey painful say di judge no look di case well as im suppose do,” Obanikoro tok.
Meanwhile, Obanikoro post for im X page to congratulate im opponent Thaddeus on im victory at di appeal court.
“I go like to congratulate Representative Jude Thaddeus Attah on im victory at di appeal court today. Make we throw our support for am so e go fit give us good representation for di next four years for Eti-Osa,” Obanikoro write for im page.
