Alex Pereira knock out Israel Adesanya for im second kickboxing fight despite controlling most of di bout until di final round.
Di UFC 281 fight wey happun for Madison Square Garden don become one of di historical bouts for di sport.
Adesanya bin dey control di fight – e wound Pereira two times.
For di first round di Nigerian get chance to end di fight wit knock out but e be like say over confidence make am relax small – may be e tink say e dey too early to end di fight.
Den out of nowhere Pereira bounce back begin knack Adesanya wit combo.
Di Brazilian right hand punch enta Adesanya well wey make am almost fall inside di cage.
Pereira kontinu to pour wit im right hand and left hook – e follow am up wit kicks.
Na from di fourth round im begin try to buy time but Pereira just kontinu to knack am.
For di fifth round di Brazillian succeed in giving Adesanya two quick blows wey throw am off balance – di referee wave to end di fight.
Di fight end for knockout.
Israel Adesanya vs Alex Pereira preview
For 2016, Pereira win Adesanya by decision – for 2017, e beat di Nigerian-born fighter again for knock out.
Alex Pereira win on Saturday don make am three times e don beat Israel Adesanya.
As tins be, e don end di reign of one of di great middleweight champions for promotional history.
Adesanya bin dey do evri tin well until di last round.
E frustrate Pereira wit im movement and several counter attacks but di Brazilian believe in im punch and e wait patiently to deliver am on Adesanya.
For di fifth round Adesanya start well and e keep di control until Pereira catch am.
Dis na Israel Adesanya first loss for middleweight of di UFC, though im bin lose decision to Jan Blachowicz for m attempt at di light heavyweight title.
