Di National Identity Management Commission (NIMC) bin recently announce say dem go introduce a new national ID card wey go also get payment functionalities.
E neva clear wen pipo go start to dey collect dis new national ID, but NIMC don announce how you go fit apply ahead of wen dem go dey ready to roll am out.
According to di commission, na for NIMC office, bank or a bank approved center pipo go fit apply for di new card, becos e go work both as ID card and ATM card.
Di step by step application na like dis:
- Go to NIMC office or your bank or a bank-approved centre and request for di new card
- You go provide your National Identity Number and proof say you don reach 18 years
- Di bank go forward your NIN to NIMC and oda identity data to verify your information
- Di bank go use di verified information to prepare di EMV data bifor dem go personalise am and print on am
- Afta di printing, di bank go issue di card to you
- E dey take two to three working days for di new card to dey ready
Di ATM part of di card go get expiry date but e no mean say di card don expire as ID card.
Wen di ATM part don expire, you fit go to di bank to renew am, or you fit go ahead to dey use di card only as ID card.
According to di NIMC website, foreigners wey be legal resident for Nigeria go fit apply for di card also.
Dis card no be for free.
How dis new card dey different from di former one?
Remember say di former national ID card bin get features wey dey like ATM, but e no dey connected to any bank and pipo no fit dey use am withdraw moni.
But according to NIMC, di major difference for dis new card be say: “Di card get capacity, flexibility and ability to store data on card for real-time transactions and verifications wen e dey off-line mode.”
“Di card dey different becos e fit verify identification and process transactions for any location witout internet, and wit high uptime and zero fraud,” NIMC tok for dia website.
“E dey highly interoperable and e dey work wit conventional systems on open loop wallet. You go fit use di card both locally and internationally.”
Like di old national ID card, di NIN of di holder no go dey visible on di card bodi, but you go fit access am by scanning di QR code wey dey di card.
NIMC tok say e no dey advisable for pipo to give out photocopies or scanned copies of di new card to unauthorised parties, sake of say e go get some sensitive payment details.
Wetin go happen to di old national ID card?
According to wetin NIMC management tok, “all old cards go dey replaced wit dis new one on need basis”.
E mean say na pesin gatz indicate interest bifor dem go issue am di new card becos “e no dey compulsory” say evribodi gatz get am. And e no be free of charge.
- How technical fault make ATMs begin give pipo moni anyhow
- New national ID card – wetin e dey about, how e go work?
- How to change date of birth by yourself for NIN
