Di Department of Home Affairs don announce dia preliminary findings afta dia investigation into di citizenship of Chidinma Adetshina wey dey contest for Miss South Africa.
Chidimma citizenship bin cause controversy on social media afta some pipo bin call on di organisers of di pageant say make dem disqualify her as dem allege say she no be South African.
Di beauty model get Nigerian father and her mama get Mozambican roots but dem born Chidimma for South Africa.
She dey among 10 women wey go participate for di competition wey go hold for di capital Pretoria, dis Saturday
According to di Department of Home Affairs, on Monday 5 August 2024, di organisers of di event bin send di department one request to verify di citizenship of one contestant, Chidimma Adetshina.
Dem say dis request dey accompanied by written consent from both Adetshina and her mama.
- Miss South Africa organisers respond to critics about Chidimma Adetshina qualification to contest
- Tributes pour in for Black Panther actress Connie Chiume wey die at di age of 72
Department of Home Affairs, for dia preliminary findings allege say:
- “Prima facie reasons exist to believe say fraud and identity theft fit don deycommitted by di pesin recorded in Home Affairs records as Chidimma Adetshina’s mama;
- “Adetshina no participate for di alleged unlawful actions of her mama, as she be pikin at di time wen di activities take place for 2001;
- “One innocent South African mama, wey her identity fit don dey stolen as part of di alleged fraud committed by Adetshina mama, suffer as a result becos she no fit register her pikin;
- “Di Department don broaden dia investigation to identify and pursue any officials wey dey involved for di alleged fraudulent scheme, and dey obtaining legal advice on di implications of di alleged fraudulent activity on Adetshina citizenship status; and
- “Upon di completion of di investigation, Home Affairs intend to press criminal charges against all implicated parties.”
Di Department of Home Affairs tok say e get some ongoing tok-tok wit all stakeholders wey include Adetshina mama.
Dem say, “Dis case wey come from alleged mago-mago activities wey dey committed 23 years ago, bin give reason make di Home Affairs begin dey use digital way for applications and verification processes so e go help di department against mago-mago wey be like di reform wey dem do for di South African Revenue Service for di late 2000s.”
“Di case also tok on di reason for di department to block certain duplicate IDs, and say di court order of unblocking of dis documents gatz dey handled wit caution.”
Department of Home Affairs say throughout dis process, dem dey guided by commitment to restore and uphold di rule of di law as well as di rights of all parties.
Chidimma mama and family neva comment on di latest findings by di Department of Home Affairs.
How di controversy bin start
Chidimma Adetshina bin dey contest for di Miss South Africa pageant but some gbege bin happun as some pipo bin tok say she no fit contest.
Di eligibility of Chidimma Adetshina wey come from Pimville, Soweto, and questions about her nationality begin trend for social media since she enta di last 16 stage.
Some social media users dey ask make dem comot am for di contest becos dem feel say she no be South African.
Di Miss South Africa 2024 go be di 66th edition of di pageant and di grand finale go hold on Saturday, 10 August 2024 for Pretoria.
According to wetin dey di Miss South Africa website, eligible contestants and “applicant gatz be South African citizen and get valid South African passport. If di applicant hold dual citizenship, please provide details of both”.
But di eligibility of Chidimma dey questioned.
Na di 2023 winner of di beauty contest Natasha Joubert of Gauteng go crown her successor for di end of di programme and na di winner go represent South Africa for Miss Universe 2024 pageant wey go hold for Mexico.
Wit dis latest development from di South Africa Home Office, e no dey clear wetin go happun next concerning Chidimma participation for di beauty contest.
- ‘Dis period fit dey hard on us’ – Key tins Tinubu tok for im new address to Nigerians
- Tributes pour in for Black Panther actress Connie Chiume wey die
- Kamala Harris pick Tim Walz as her running mate
