Thousands of pipo don turn out for di funeral procession of Hamas political chief, Ismail Haniyeh, wey bin die for one missile strike for Tehran on Wednesday.
Iran Supreme Leader, Ayatollah Ali Khamenei, na im go lead di prayers bifor dem go bury di Hamas leader for Qatar.
US media quote Iran officials tok say di supreme leader don order a direct attack against Israel, who dem say dey responsible for di attack on Iran soil.
Israel neva comment on di assassination directly.
However, Israel Prime Minister Benjamin Netanyahu tok say im kontri don deliver “crushing blows” give dia enemies, including di killing of one senior Hezbollah commander for Lebanon.
- ‘Israel go suffer ‘harsh punishment’ for killing Hamas leader’ – Iran goment
- Hezbollah, Israel and di Golan Heights – Wetin dey happun and why?
- Inside Gaza hospital afta Rafah ‘massacre’ strike
“Since di strike for Beirut, we don dey hear threats from all sides. We dey prepared for any scenario and we go stand united and determined,” Netanyahu tok for one televised address.
UN Secretary-General, Antonio Guterres don cut warning to tok say hostile situation for di region fit escalate dangerously.
Hamas armed wing on dia part say di death of Haniyeh go “take di battle to new dimensions” and e go get major repercussions.
Na di group bin attack Israel on 7 October, 2023 and kill about 1,200 pipo.
Since dat attack, Israel don vow say dem go destroy Hamas.
Here na some foto of how Haniyeh funeral dey go for Iran: