Di death of one media personality for Kenya Jahmby Koikai dey cause serious reactions afta she battle a painful disease – Endometriosis – for a long time before she die.
According to tori, di reggae star wey also dey known as Fyah Mummah Jahmby bin die on 3 June for hospital.
She also dey known as MC Mary Njambi Koikai afta she begin her career for radio before switching to reggae music
Njambi Koikai campaign for di fight against Endometriosis wey sabi pipo say na a leading cause of infertility for women.
She bin dedicate her campaign to speak for women say make dem know say “period pain no dey normal.”
“Di silent killer pain wey need to dey declared as a national disaster na Endometriosis. Millions of young girls and women dey bleed to death silently and urgent action by goment dey required,” Jahmby bin write on March 2024, just months before her death.
Her death don cause reactions for Kenya.
Maaan… I still have vivid memories when we were in Dubai together and this was trending… Kumbe hawkujua tulikuwa…
Posted by Maina Kageni on Tuesday, June 4, 2024
CONFIDENT, COURAGEOUS, ASSERTIVE!
We have lost an exceptional champion. You fought a strong battle. Rest Well Fyah Mummah Jahmby Koikai.Posted by Hon. Millicent Omanga – Mama Miradi on Tuesday, June 4, 2024
‘Endometriosis no be spiritual problem, na medical condition’
‘You fit win cancer’ – Survivor
Na true say too much sugar dey give cancer?
How Jahmby Koikai battle Endometriosis
Jahmby say she battle Endometriosis for ova 19 years.
Before she die, di reggae star bin narrate for May 2024 how she battle di disease for plenti years before dem even diagnose her.
Endometriosis na di sickness wey dey happen wen di endometrium wey suppose dey inside di uterus come dey wia e no suppose dey like on top di ovary, kidney or inside belle.
“I bin get a diagnosis afta 19 years of living in horrific pain. I no fit describe to you wetin I don go through because I no get words.”
“My teenage years dey brutal. My twenties- 30s no dey easy. Na very very expensive disease to treat and post-recovery even require a lot of care sake of various side-effects,” Jahmby share for her Instagram page for March 2024.
Six years ago, she reveal say she undergo a life-changing surgery sake of full-body disease and di disease don affect plenti place for her body.
“We no get idea say di disease don affect my heart, my back, my appendix (wey dem later remove), my teeth, my gums, my lungs and diaphragm, I bin dey diagnosed wit acute anaemia.”
Njambi Koikai say na until she reach di Center for Endometriosis Care for Atlanta before she sabi how far di disease don spread for her body and di kain damage wey e don cause up to her lungs.
“My eyesight dey affected and I bin need a new prescription.”
She say na becos say e take long before dem diagnose di disease for her body na im make am spread for every part of her body afta plenti surgeries.
She bin appeal to Kenya goment make dem take di issue serious before she die.
Wetin be Endometriosis?
Di disease dey happun wen tissue wey dey similar to di lining of di womb go build up ontop oda organs wey include di ovaries or fallopian tubes.
Di tissue lining for di womb go dey build up and grow every month, and later break down and bleeding go happun.
Unlike cells wey dey di womb wey fit leave di body during menstruation period, dis blood wey fit dey anoda part of di body no fit comot from di body and e dey result in inflammation (swelling) and scar tissue.
E fit cause very serious pain and tiredness wey also fit make am difficult to get pregnant.
Endometriosis fit kill?
Some experts tok say di disease no fit kill in itself but e fit affect pesin life sake of di kain complications wey dey associated wit am.
Sabi pipo say endometriosis fit increase di risk of ovarian cancer.
Di treatment wey dey for am na pain relief and surgery to remove di growth.
Di disease dey affect body parts wey include ovaries, fallopian tubes, uterus, bladder—and early diagnosis fit help wit di correct treatment to apply.
According to Endometriosis UK, cure no dey for di disease.
Treatment for Endometriosis
Dr Abayomi Ajayi wey be fertility doctor tell BBC Pidgin for 2018 say “endometriosis no get cure na only treatment dey” and dat one na to manage di pain with strong pain tablet, injection or surgery and IVF wen di woman wan get pikin because e dey affect every aspect of reproduction from egg production to di pregnancy sef, so many women wey get am fit no carry belle.
Im say early detection dey very important to help di woman make important decision like wen she go get belle, di kain treatment she go get especially for surgery and weda she go harvest her eggs keep till wen she ready for pikin.
Dr Ajayi come advice say make pipo get knowledge of wetin endometriosis be because e no be spiritual problem.
- ‘Endometriosis no be spiritual problem, na medical condition’
- ‘You fit win cancer’ – Survivor
- ‘Cancer dey kill people pass for world’ – WHO
