Legendary highlife singer Godwin Opara wey pipo sabi well-well as ‘Kabaka’ don die.
E die at di age of 77-years-old.
Kabaka record label, Derda Promotions tok say di music legend wey pioneer and transform highlife music die on Thursday 21 March.
Ammarachi Anyanwu, chief operating officer of Derda Promotions, announce im death for statement on Friday.
“Kabaka na talented and beloved songwriter and guitarist wey bring joy to countless fans wit im ogbonge highlife music,” Ms Anyanwu tok.
She, however, no reveal di cause of im death.
E die barely six months afta e come back to di highlife music industry.
Last September, di late singer bin tok say im don ready to pursue im music career again afta 17 years wey e take break from music.
Im music journey span several years, genres and band.
E follow start di Oriental Brothers International Band for 1973, one Highlife powerhouse wey dey known for dia socially conscious lyrics, instrumental mastery, and authentic sound wey millions across Africa and beyond dey vibe to.
Rewarding career
For 1976, Kabaka begin im solo career, and form The Kabaka International Guitar Band.
E continue to produce high-quality highlife music. E release fourteen albums and create hits like “Mangala Special,” wey land am prestigious award.
E also experiment wit Ezebongo rhythms, wia e showcase im versatility and creativity.
Later, e join forces wit di Imo City Band, further solidifying im status as highlife legend.
Wit di support of Derda Promotions, Kabaka make triumphant return for September 2023 wit di album “The Return of Kabaka” wey get ova one million streams and e trend as one of di top 100 albums worldwide.
- How Nollywood mourn popular ogbonge comic actor Mr Ibu wey die afta sickness
- Burial of actor Sisi Quadri happun wit tears and sorrow as Nollywood celebrities mourn am
- Nasarawa state university rice distribution turn deadly afta at least three pipo die for stampede
