Di Fifa U-20 Women’s World Cup for Costa Rica don enta di quarter final stage.
Eight teams still remain out of di 16 wey bin start di competition dis month.
Di teams wey still remain na Spain, Mexico, Colombia, Brazil, Nigeria and Netherlands.
Nigeria na di only Africa side for di competition afta Ghana crash out for di group stage.
Di quarter final round of matches for di women’s tournament go begin for August 20-21
See di full quarter final fixtures here.
Spain vs Mexico (Kick off time na 11:15pm WAT on Saturday)
Spain and Mexico go play di first match for di quarter finals round of di U-20 Women’s world cup.
Na for di Estadio Nacional de Costa Rica, San Jose stadium dey go play di match.
Spain finish top of group A to reach di last eight while Mexico finish second for group B to qualify.
Di European team go need bring dia A game against Mexico wey beat Germany.
Colombia vs Brazil (Kick off time na 2:45am WAT on Sunday)
Di game between Colombia and Brazil na South American derby.
Di two teams moral dey very high ahead of dia match on Saturday based on dia form for di group stage.
Colombia play 2-2 draw against New Zealand for dia last match to book dia spot for di last eight as Group B winners.
Colombia Linda Caicedo na one of di players to watch, her goals help her kontri to reach di knock out round.
For Brazil dem knack di host Costa Rica 5-0. Di Seleção neva concede any goal for di competition.
Dis game go take place for di stadio Nacional de Costa Rica, San Jose stadium.
Nigeria vs Netherlands (Kick off time na 11:15pm WAT on Sunday)
Nigeria na di only African team wey remain for di competition.
Falconets finish top of group C with nine points di group stage wit nine points.
Di Nigerian team score five goals for di group stage.
For Netherlands dey finish second for group D wit six points.
Di Dutch team also score five goals for di group stage.
Esther Onyenezide na di leading goal scorer for Nigeria wit three goals in two matches.
Di match go take place for di Estadio Alejandro Morera Soto, Alajuela stadium.
Japan vs France (Kick off time na 2:45am WAT on Monday)
Di final match for di quarter – final round na between Japan and France.
Dat game go take place for di Estadio Alejandro Morera Soto, Alajuela stadium.
Japan wey be di reigning champions go hope to carry dia fine form for di group to dis round.
Dem dey unbeaten for di competition and finish top of Group D wit nine points.
“Winning di title na our main objective. We prepare for our opponents in our style, di Japanese style. E no matter who we face.” Ibuki Nagae, Japan defender tell Fifa.com
For France dem finish second for group C wit six points.
See di format for di tournament
Sixteen teams compete for di 2022 FIFA U-20 Women’s World Cup.
Dem be di: Host Costa Rica
Concacaf – Mexico and Canada, USA,
Asia- Australia, Korea Republic and Japan
Africa-Ghana and Nigeria,
Europe – Spain, Germany, France and the Netherlands
Oceania- New Zealand
South America- Brazil and Colombia
No first-time participants for dis year U-20 Women’s World Cup.
Di 16 kontries dey drawn into four groups of four teams.
Di top two for each group go qualify to di quarterfinals.
Quarter finals rounds go begin on Saturday, Aug. 20 and Sunday, Aug. 21.
Di winners of those matches go advance to di semi-finals on Thursday, Aug. 25.
Di Championship and Third-Place match dem go play am on Sunday, Aug 28.
