Liverpool book dia place for dis season final of di Uefa Champions League afta dem come from behind to beat Villareal wey finish di match wit ten-men.
Di English side score all three of dia goals for second half to win 3-2 (5-2 on aggregate) afta Villareal race into two goal lead for first half.
Fabinho, substitute Luis Diaz and Sadio Mane na dem score di goals for Liverpool afta Boulaye Dia and Francis Coquelin bin don open di scoring for Villareal.
Jurgen Klopp and im boys bin no play like dem don do for much of dis season as Villareal bin ask dem so many questions for di first half.
Afta only three minute, Dia tap Capoue cutback into di net before Coquelin increase dia lead just before half-time.
Di Reds provide di answers for di second half as dem come alive afta Fabinho shoot shot through di legs of Villareal goalkeeper Geronimo Rulli wey no put in good performance on di tonight.
Diaz wey come on for Jota for di second half den equalise five minutes later before Mane round off di 5-2 aggregate victory wit simple tap in into di net afta im don beat di onrushing Rulli.
Villareal come go down to ten-men on 86 minutes, Capoue receive second yellow card for im late foul on Curtis Jones.
Di man advantage no matter for Liverpool as dem bin don already do di damage to end Unai emery and Villareal giant-killing adventure for dis season Champions League.
Liverpool wey fit win four trophies dis season now dey wait who between Real Madrid and Manchester City go face dem for di final wey go take place for Stade de France, Paris on Saturday, 25 May.
No English side don ever win di Champions League, Premier League, FA Cup and League Cup all for di same season, Liverpool dey aim to create history.
- Real Madrid vs Man City Champions League preview
- Fifa give reason why dem ask Nigeria to play one match without fans
How di match go
Second half
Liverpool go make change before di second half go start as Luis Diaz dey warm up.
Im go replace Diogo Jota.
46 mins – Di home team don resume di second half. Big 45 minutes to decide who go qualify for di final.
48 mins – Keita run into Estupinan, referee don give Liverpool freekick for good position. Wetin go comot?
Di cross from Alexander-Arnold hit Mane go out go out for goalkick.
52 mins – Luis Diaz introduction don give Villareal sometin to tink about as him and Foyth go put leg for one trouser for dat right hand side.
54 mins – Unlike di first half, Liverpool don dey come out to try press Villareal. Arnold send in cross wey Rulli catch well.
55 mins – Trent Alexander-Arnold long range shot take deflection from Coquelin come land on top di post. Liverpool come close!
Soon aftawards Diaz shoot shot straight at Rulli.
60 mins – Liverpool don begin show di urgency dem need. Keita try to find Salah inside di box wit cross but Torres clear am.
61 mins – Liverpool pull one goal back! Fabinho drill hot shot through di legs of Geronimo Rulli.
Villareal 2-1 Liverpool (2-3 on aggregate).
62 mins – If di tie end like dis Liverpool go qualify on aggregate.
63 mins – Yellow card for Capoue afta im foul goalscorer Fabinho.
67 mins – Diaz score Liverpool second. Di substitute rise high to head in lexander-Arnold cross.
Villareal 2-2 Liverpool (2-4 on aggregate).
68 mins – Villareal make two substitutions. Chukwueze and Pedraza don come on for Coquelin and Moreno.
74 mins – Sadio Mane give Liverpool lead. Di Senegalese dribble past goalkeeper and defender as im slot di ball into empty net.
Liverpool surely now don qualify for di final as e bel. Villareal 2-3 Liverpool (2-5 on aggregate).
77 mins – Yellow card for Liverpool right back Trent Alexander-Arnold.
79 mins Villareal make three substitutions. Alcacer, Trigueros and Aurier all come on for Boulaye Dia, Estupinan and Albiol.
80 mins – Liverpool respond wit dia own substitutions as Klopp don send on Henderson, Curtis Jonesm Tsimikas for Keita, Thiago and Robertson.
Soon afta di away team almost increase dia lead but goalkeeper Rulli use im legs to deny Jones.
81 mins – Giovani Lo Celso receive yellow card for im foul on Fabinho.
84 mins – Milner don come on for Fabinho.
85 mins – Pau Torres don receive yellow card for im rash foul.
86 mins – Red card for Etienne Capoue. Di former Tottenham man take out Jones wit late tackle.
89 mins – Salah try to increase Liverpool lead but im scuffed shot go wide.
90 mins – We don enta two minutes of stoppage time.
Full time – Villareal 2-3 Liverpool (Liverpool win 5-2 on aggregate). Liverpool don qualify for di 2021/22 Champions League final.
First half
1 mins – Liverpool don start dis second-leg.
2 mins – Gerard Moreno handle di ball, referee blow for foul.
3 mins – Goal for Villareal Boulaye Dia don score im first goal for di Champions League.
Di Senegal forward tap in Etienne Capou cutback to open di scoring. Villareal 1-0 Liverpool (1-2 on aggregate).
7 mins – Liverpool players look like say dem no expect dat early goal. Dem still dey lead but di game now don tie wrapper.
10 mins – Andy Robertson send in freekick into di box, di cross hit Jota leg go out for Villareal goalkick.
12 mins – Dani Parejo! Di Spanish side go close to scoring di scond goal but di midfielder shot just go wide.
14 mins – Thiago try im luck from just outside di penalty box, goalkeeper Geronimo Rulli just stand watch as di ball go over.
17 mins – Naby Keita try to draw di english side back into di game wit outside shot wey go out for goalkick.
22 mins – Moreno receive Capoue pass and try to break into attack but di flag don go up for offside wen im try to find Dia.
25 mins – Liverpool dey yet to get shot on target for dis second-leg as dem dey struggle to hold onto di ball.
Ball Possession – Villareal 55%, Liverpool 45%.
30 mins – Van Dijk no dey happy afta referee blow im whistle say im foul Villareal player.
Parejo send di freekick in, Alisson catch comfortably.
35 mins – Both teams dey find am difficult to create any meaningful chance as di game don go quiet for dat area.
38 mins – Villareal want penalty afta Lo Celso run into Alisson. Di Argentine dey down as im teammates ask di referee to check VAR.
Di referee Danny Makkelie blow for corner instead. Di corner from Parejo no produce anytin.
40 mins Villareal score second goal Francis Coquelin don equalise di tie as im head di Spanish side level. 2-2 on aggregate.
42 mins – Liverpool forward Jota shoot towards goal but Albiol block im shot.
45 mins -Referee Makkelie don add two extra minutes before half time.
Half-time Villareal 2-0 Liverpool (2-2 on aggregate).
Villareal vs Liverpool lineup
Villarreal XI: Rulli, Estupinan, Torres, Albiol, Foyth, Coquelin, Capoue, Parejo, Lo Celso, Moreno, Dia.
Subs: Asenjo, Jorgensen, Gaspar, Mandi, Aurier, Iborra, Trigueros, Pedraza, Alcacer, Chukwueze, Pena, Gomez.
Liverpool XI: Alisson, Robertson, Van Dijk, Konate, Alexander-Arnold, Thiago, Fabinho, Keita, Jota, Mane, Salah.
Subs: Kelleher, Gomez, Matip, Tsimikas, Milner, Henderson, Oxlade-Chamberlain, Jones, Elliott, Minamino, Diaz, Origi.
