Premier League Christmas fixtures and schedule of games

Matheus Nunes beat Chelsea keeper Kepa Arrizabalaga to score — Matheus Nunes bin score di only goal wen Wolves last host Chelsea for April

One Premier League match go happun for Christmas Eve for di first time inside 28 years wen Wolves host Chelsea.

Di original schedule na for 23 December, but di fixture go now happun on Sunday, 24 December for 13:00 GMT.

Di only previous Christmas Eve match since di Premier League dey formed for 1992 bin take place for 1995, wen Leeds United beat Manchester United 3-1.

Three rounds of festive fixtures bin set for 23, 26 and 30 December, before dem bring di Crystal Palace v Brighton game from di first round forward to Thursday, 21 December (20:00), while Aston Villa v Sheffield United go take place on Friday, 22 December (20:00 GMT).

Six matches still remain on Saturday, 23 December before Chelsea visit Wolves on Christmas Eve.

Di second round of festive fixtures go begin wit five matches on Tuesday, 26 December and three on Wednesday, 27 December.

Den on Thursday, 28 December, Brighton host current Premier League leaders Tottenham and West Ham travel to Arsenal.

Sake of those matches go take place for later date, afta six matches hold on Saturday, 30 December, Arsenal trip to Fulham and Tottenham home match against Bournemouth dey scheduled for Sunday, 31 December.

Liverpool versus Newcastle (20:00) on Monday, 1 January and West Ham against Brighton on Tuesday, 2 January (20:00) complete di fixtures.

Di Premier League tok say: “As e dey for previous seasons, special arrangements dey ground to allow more time between games across di three festive match weeks.

“Dis go allow greater time for players to recover, wit di rest periods between matchweeks 18, 19 and 20 increase to make sure say no club play within 60 hours of anoda match.”

Chelsea go get di shortest recovery time, wit 143.5 hours between dia first kick-off and third kick-off, while Brighton get di most wit 287.5 hours – double dat of Chelsea.

Di Football Supporters Association say Christmas Eve fixture na “one unwanted present wey no-one ask for”, while di Chelsea Supporters’ Trust (CST) describe di decision as “totally unacceptable”.

Di CST say dem go request say di Premier League consult supporters on dis issue and reverse di decision, as dem don request one urgent meeting wit decision-makers alongside di12 Wolves 1877 Trust.

Di Premier League previously decide against rearranging Arsenal v Liverpool as Christmas Eve fixture for 2017 following one backlash from supporters.

One match wey neva get date na Manchester City home match against Brentford, originally scheduled for 23 December, wey don dey postponed sake of di champions participation for di Fifa Club World Cup.

Afta di winter World Cup for Qatar last season, Premier League fixtures bin resume on 26 December wit one televised game every day from den until 5 January – except for 29 December.

Sky Sports, TNT Sports and Prime Video go share broadcast rights – wit 29 December again di only date without televised Premier League match during di festive period.