Elections in Uganda: Yoweri Museveni shake body to Jerusalema challenge

Uganda President Yoweri Museveni don release one animated video of im attempt to do di Jerusalema dance challenge,.

Di challenge become global dance phenomenon last year afta di release of di Jerusalema song by South African musician Master KG.

President Museveni say e release di video afta im youthful supporters ginger am to do so.

Ugandans go vote on Thursday for new parliament and president.

Mr Museveni, wey don dey power for 35 years, dey seek for sixth term. A total of 11 candidates dey run for presidency including one woman.

Facebook ban accounts wey link to ruling party ahead of Uganda elections

Facebook logo

Getty Images
Facebook logo

Meanwhile, Facebook don ban some of di accounts wey belong to Uganda goment officials.

Di accounts wey di US social media giant take down na fake and duplicate accounts wey dey linked to di kontri ministry of information and dem dey use am post as di kontrii dey prepare for elections dis week.

Uganda pipo go vote on Thursday for election wey long time president Yoweri Museveni go contest wit ten oda candidates including ogbonge opposition leader Bobi Wine – di singer wey politician – wey don dey pepper di ruling party for sometime now.

Facebook tok for statement say as di Uganda elections dey near, “we move quickly to investigate and take down dis network.”

Dem add say: “We find say dis network of accounts dey connected to di goment Citizens Interaction Centre for di Ministry of information and Communications Technology for Uganda.”

“Dem dey use fake and duplicate accounts to mage pages, comment for oda pipo post, pretend to be oda pipo, re-share posts for groups to make dem look more popular dan dey really dey,” Facebook tok.

Uganda minister of information, Judith Nabakooba, tell tori pipo Reuters, say she need more time to study di mata before she go fit tok anytin.

Many opposition protesters don die during Bobi Wine election campaign rallies wen authorities pursue dem sake of say dem no observe Covid-19 protocols.