Crystal Palace vs Liverpool highlights: Roberto Firmino, Mo Salah, Sadio Mane score as di Reds flog Eagles 7-0

Sadio Mane

Reuters

Liverpool thrash Crystal Palace 7-0 for di Premier League game wey happun on Saturday.

Na di first time Liverpool go score ogbonge 7 away goals for PL.

Takumi Minamino, Sadio Mane, Roberto Firmino, Jordan Hederson and Mo Salah score for di game.

Firmino and Salah score two while di rest score one each as di Reds go six points clear.

Liverpool run enta lead for di third minute as Mane set up Minamino, wey no sweat to find di bottom corner.

And di Senegal international double up on di advantage for di 35th minute afta one ogbonge turn, before Firmino tap home to round off brilliant counter-attack as half-time nack.

Captain Henderson put in di fourth just afta di restart before Firmino add im second afta good work from Salah.

Salah head home di sixth with nine minutes wey remain, before e double on im scores with brilliant individual effort small time later.

Liverpool last score seven for top-flight away game against Derby County for 1991.

Dis na Jurgen Klopp 127th victory as Liverpool boss for di Premier League, im overtake Rafael Benitez (126) as the Reds boss with di most wins for Premier League history.

Meanwhile Liverpool captain Jordan Henderson tell BT Sport say: “I tink say we dey ruthless today and take our chances wey dey important always. We dominate di game for large periods but I still think say we lose-guard at times. Overall, we dey happy with di performance. To finish dis week off with di win afta midweek dey important and we manage to do am.