BBNaija: Neo ‘wash’ Vee pant for Big Brother Naija lockdown house – See how fans react

Fans enta social media to debate whether dem fit wash dia partners pant ontop tori say BBNaija housemate Neo wash Vee pant for di show.

On Wednesday night for di laundry room, Nengi shock as she hear say Neo dey wash Vee pant.

Neo and Vee na di only couple wey make am to di top 5 of di Big Brother Naija ‘Lockdown’ reality show afta dem survive last week eviction.

For inside video wey dey go viral for social media, Camera show Neo dey wash clothes, while Nengi and Vee dey look am.

Di mata start wen Vee tell Neo say “My dear, one pant dey miss” di tin surprise Nengi as she first she reserve her comment but later voice out say “Neo, you even wash pant join.”

Vee reply her say Neo know say she na clean girl.

Nengi come tell her say she be very lucky girl.

Dis don make plenty fans react. See some of di reactions.

Who be Victoria Adeyele AKA Vee

Victoria Adeyele wey be 23 years old na musician wey base for Lagos, Nigeria. Dem born and raise her for London and she move come Lagos almost one year ago to begin her music career.

She say her parents na Nigerians and say she dey enjoy acting, socializing and making pipo laugh. Vee say she no eva don dey relationship wey last longer than six month.

Who be Emuobonuvie Akpofure AKA Neo

Emuobonuvie Akpofure na 26 year old ride-hailing app driver from Delta State . E describe imsef as fun, tolerant, loving and smart. E also dey secretive.

E biggest achievement na wen im win N 500 000 from one talent competition. E say e like wen pipo dey underestimate am and call imsef problem.