Who won the HOH in BBNaija today: Ozo pick Nengi as deputy as e become Head of House again

Ozo don become di new head of house of Big Brother season 5 afta im win di HoH Challenge on Monday evening.

Dis na di second time wey Ozo dey be HOH and as di Head of House, e go get automatic protection alias immunity for dis week eviction and exclusive access to di Head of House Lounge.

E pick Nengi wey be im good friend as im deputy head of house and she go enjoy dis privilege with am.

Nengi no waste time to hug Ozo afta e pick her and accept to be im deputy Head of House.

Big brother bin ask Ozo to pick second and third choice in case Nengi no accept and e choose Dorathy as second while Vee as third.

Ozo dey take ova from Kiddwaya wey bin di head of house for di week of 17 to 24 August week but receive strike sake of say im allow Erica sleep for di HOH room – dis na wetin no dey allowed.

Sake of dis Erica, Kiddwaya and im deputy, Tolanibaj get strike and no dey allowed to participate for today Head of House challenge plus nobodi fit nominate dem as deputy HOH.

Housemates wey dey up for eviction dis week

12 housemates dey up for possible eviction dis week out of di 14 wey still remain for di house aside from di HOH, and im deputy.

See di full list:

  • Victoria Adeyele AKA Vee
  • Timmy Sinclair AKA Trikytee
  • Terseer Waya AKA Kiddwaya
  • Ngozi Nlewedim AKA Erica
  • Nelson Enwerem Prince
  • Lucy Essien
  • Dorathy Bachor
  • Florence Wathoni Anyansi
  • Ezekiel Bright Osemudiame AKA Brighto
  • Emuobonuvie Akpofure AKA Neo
  • Tolani Shobajo AKA Tolanibaj
  • Olamilekan Agbeleshe AKA Laycon