Tolulope Arotile death: Air force release investigation report and full details of di last moments of Nigeria first female combat helicopter pilot

Nigeria Air force don reveal di result of dia investigation into di death of di kontri first female combat helicopter pilot.

According to NAF, dia preliminary investigation reveal say, Arotile die as a result of “blunt force trauma and too much bleeding afta her secondary school mates jam her”.

Di Nigeria Air force also tok say because di case na civil case, dem don hand am over to di Nigerian police and dem go charge di suspects go court accordingly.

NAF tok dis one for press briefing on Sunday, 19 July, 2020. Di briefing dey come as some pipo bin dey ask for more details into di death of Arotile.

Arotile death on 16, July, 2020 inside NAF base for Kaduna bin shock di kontri and make many pipo wonder.

Di last moments of Arotile life

According to di investigation, di late Flying Officer Tolulope Arotile, Squadron Pilot for di 405 Helicopter Combat Training Group (405 HCTG) Enugu, bin dey attached to di Air Component of Operation GAMA AIKI in Minna.

But afta she complete her promotion exams, she bin dey Kaduna dey wait make dem deploy her. But during dia period, she dey stay wit her sister Mrs Damilola Adegboye, for Sabo area for Kaduna and once in a while, she dey visit di NAF base.

See di last moments of her life as NAF tok

  • On di 14 of July 2020 at about 10.55am, late Flying Officer Arotile receive phone call from her colleague, Flying Officer Perry Karimo, her fellow helicopter pilot from di 405 HCTG, wey wan discuss wit her about dia deployment.
  • At about 10.58am, she come call Squadron Leader Diepiriye Batubo, di Group Operations Officer (GOO) of 405 HCTG, wey bin dey Minna to clarify issues concerning her deployment .
  • Afta dat, her sister cari her come base to charge her phone for inside one house for di Instructor Pilots’ Quarters wey belong to Squadron Leader Alfa Ekele.
  • From dia, her sister drop her for base mammy market for around 4pm wia she go do photocopies and laminate her document.
  • As she finish from dia dey waka go home from mammy market around 4:30 pm, na im three of her former schoolmates for Air Force Secondary School (now Air Force Comprehensive School) Kaduna; Mr Nehemiah Adejoh, Mr Igbekele Folorunsho and Mr Festus Gbayegun, drive pass her inside dia Kia Sorento SUV, with Registration Number AZ 478 MKA.
  • Adejoh wey be civilian bin reverse to go greet her wen di car hit her.

How Arotile take die

Arotile bin dey waka for opposite direction wen di car from di rear come knock her down wit plenti force wey make her hit her head on top pavement

Di vehicle come climb some part of her body and come wunjure her more. Dem bin rush her go hospital wey be 461 NAF Hospital Kaduna for treatment. But afta treatment her condition no beta and at about 4:45 pm di doctor on call confirm say she don die.

Investigation also reveal say di three former classmate no dey high on alcohol or any oda substance and dem bin dey detention for di Air Provost Wing, 453 Base Services Group Kaduna as investigations dey go on .

Di only tin dem discover be say di driver of di car no get driving license.

Naf tok tok pesin beg Nigerians make dem no use her death do politics or religious or ethnic issue and dat make dem allow her family and di force to mourn her in peace.