Kogi FMC attack: Wetin we sabi about di ‘protest’ wey happun for di Federal Medical Centre Lokoja

Some I-no-go-gree pipo don go attack di Federal Medical Centre for Lokoja, Kogi, north central, Nigeria.

According to tori, di attack happun wen doctors bin dey plan do one press briefing about coronavirus and di protesters wey destroy di administrative block also carry computers and files wey get information about coronavirus.

But Kogi state goment don come out to tok wetin dem say happun.

Di State Commissioner for Information and Communications, Kingsley Fanwo for inside statement tok say contrary to wetin pipo dey tok, na some relatives of di patients wey dey di hospital protest sake of say di hospital management no attend to dem.

He say many pipo dey di emergency ward wey dem no attend to and one woman even born pikin for gate.

Oga Fanwo explain say tension bin don dey dey build up since yesterday wen di patients and dia relatives hear say di hospital medical staff dey plan hold protest about Covid- 19 for di state.

But one doctor wey dey work for di hospital wey say make we hide im identity tok say na true say dem attack di hospital. He say dem collect staff laptops and dia belongings, break windows and damage plenty property for di hospital.

He say di incident shock many staff and patients and most of dem don go house.

Di doctor tok say di Joint Allocation Congress wey concern all di unions for di hospital bin dey plan to hold peaceful demonstration today on top Covid- 19 mata.

He say union leaders no longer dey comfortable wit di working conditions for di hospital.

Di situation of coronavirus for di state no too clear as di govent on several occasions deny say di virus no dey di state.

Even as di virus spread to many states for di kontri and di states wey share border wit Kogi dey record high numbers of Covid- 19 cases, di goment bin dey still insist say nobody don catch Covid- 19 for di state.

Kogi wey before now be di only two, of di 36 states including Abuja, wey claim say dem no get coronavirus infection, register two cases for di first time on 27 May, exactly three months afta Nigeria record dia first case on 27 February, 2020.

According to di latest update from NCDC, di state get 4 covid- 19 cases now.