Di Senate on Wednesday confam di appointment of Justice Kekere-Ekun as substantive Chief Justice of Nigeria afta dem screen am.
Dis dey come afta President Bola Tinubu write to di Senate on Tuesday, and ask dem to confam Kekere-Ekun as the Chief Justice of Nigeria (CJN).
Senate President, Godswill Akpabio, read Tinubu letter during plenary on Tuesday.
For di letter, Tinubu cite Section 231(1) of di Nigerian Constitution, wey empower am to appoint di CJN based on recommendations from di National Judicial Council, pending Senate approval.
Di President bin express confidence in her nomination and urge di Senate to act urgently.
- What next for Nnamdi Kanu as Justice Binta Nyako wash hand comot im case
- Edo election: Five factors wey make APC win and PDP lose
“I hereby forward di nomination of Honourable Justice Kudirat Kekere-Ekun, CON, for confirmation as di Chief Justice of Nigeria. I trust say dis request go receive di Senate prompt consideration and approval,” Tinubu tok for im message to di Senate.
Senate President Akpabio den refer di nomination to di Committee of di Whole for deliberation on di next legislative sitting.
You go remember say di National Judicial Council (NJC) for August recommend Justice Kekere-Ekun to President Tinubu as successor to di former CJN, Justice Olukayode Ariwoola.
Di 66-year-old lawyer bin dey serve as di Acting CJN since Justice Ariwoola retire last month.
Who be Justice Kudirat Kekere-Ekun
Justice Kudirat Motonmori Olatokunbo Kekere-Ekun na one of di top female Justices for di Supreme court of Nigeria.
Dem born her for May 7, 1958. She be 66 years old.
Justice Kekere-Ekun get her law degree from University of Lagos and dem call her to bar for 1981.
For her LL.M, she get am from di London School of Economic and Political Science for November 1983.
Her legal career start from Lagos south west Nigeria.
She collect appointment as Senior Magistrate Grade II, Lagos State Judiciary for December 1989.
And den become Judge of di High Court of Lagos State for July 1996.
She serve as Chairman Robbery and Firearms Tribunal, Zone II, Ikeja, Lagos from November 1996 to May 1999.
And for September 22, 2004, she step up as Justice of the Court of Appeal.
Na from dia she collect appointment go Supreme court for June 8, 2013.
Aside law, she dey enjoy reading, music, information technology and counselling.
Past Chief Justices of Nigeria
Hon. Justice Stafford Foster Sutton – 1955-1958
Hon. Justice Adetokunbo Ademola – 1958-1972
Hon. Justice Taslim Olawale Elias – 1972–1975
Hon. Justice Darnley Arthur Alexander- 1975–1979
Hon. Justice Atanda Fatai-Williams – 1979- 1983
Hon. Justice George Sodeinde Sowemimo – 1983–1985
Hon. Justice Ayo Gabriel lrikefe – 1985–1987
Hon. Justice Muhammed Bello – 1987–1995
Hon. Justice Muhammadu Lawal Uwais- 1995–2006
Hon. Justice Salisu Modibo Alfa Belgore – 2006–2007
Hon. Justice Idris Legbo Kutigi – 2007–2009
Hon. Justice Aloysius Iyorgyer Katsina-Alu – 2009–2011
Hon. Justice Dahiru Musdapher – 2011–2012
Hon. Justice Aloma Mariam Mukhtar – 2012–2014
Hon. Justice Mahmud Mohammed – 2014–2016
Hon. Justice W. S. Nkanu Onnoghen – 2016- 2019
Source National Judicial Council
- Who be di members of di UN Security Council and wetin e go mean for Africa to get a permanent seat?
- Widespread condemnation as Ghana court remand 39 anti-illegal mining protesters for police and prison custody
