Nigeria mark dia 62nd anniversary wit national event for Abuja, di kontri capital.
Leaders of di west African kontri including president Muhammadu Buhari gada for Eagles square on Saturday wia dem watch parade and performances to mark di anniversary.
Di Military Parade na im be di high point of di activities of di celebration of Nigeria Independence.
Buhari last independence event as president
Di 2022 independence anniversary na di last on wey oga Buhari go head as Nigeria president.
For im independence day broadcast president Buhari say im believe say im don serve di kontri well.
E tok about di efforts of di ruling All Progressives Congress (APC) party, for re-setting di Nigeria economy as e survive two recessions.
Di president hail di very practical and realistic monetary and fiscal policy to make sure say public finance management dey work well.
E also hail di fact say im administration give priority to di agriculture sector through providing support for activities of micro, small and medium scale companies and dis don create millions of jobs.
E say im goment make appreciable progress to fulfil im promise of creating 100 million jobs.
Foto of independence day celebration for Abuja
Former president Goodluck Jonathan, Senate president Ahmed lawan, speaker of di House of representatives Femi Gbajabiamila, di armed forces and some members of di diplomatic corps attend di event.
Heads of Ministries and Parastatals, captains of industries, also dey di event.