Court order make ASUU end strike

Di National Industrial Court wey dey sit for Abuja, Nigeria capital don order make di Academic Staff Union of Universities (ASUU) end dia seven monthss old strike.

When e dey deliver im ruling on di interlocutory injunction wey di Federal goment file on Wednesday, Justice Polycarp Hamman restrain ASUU from continuing wit di industrial action pending di determination of di suit.

Justice Polycap wey be vacation judge order say di case be returned to di president of di Industrial Court for reassignment to another judge.

E say di ruling na for di benefit of di students. “No amount of compensation fit cover for di loses of di students”.

E add say di mata na of national interest and some student don already dey deprived from serving dia fada land for NYSC and also apply for oda opportunities wey dey restricted by age.

Di lecturers don dey on strike for more dan seven months now sake of goment failure to honor dia demands wey bother on salary payment platform amond odas – several toktok between dem and di federal goment don happun but dem no dey successful.

Students sef don carry di mata enta roads in protest as dem claim say di thing don tire dem.

Igwe bin ask di court to give di suit accelerated hearing sake of say e dey urgent to enable students return go school.

But counsel to ASUU and Senior Advocate of Nigeria, Oga Femi Falana, say di union dey currently meet with stakeholders to ensure tsay di mata dey resolved come appeal to di goment to cooperate wit the union to resolve di mata.

‘Court do well’- FG counsel

Lawyers inside court


Lead Counsel to Federal Goment James Igwe(SAN) hail di Judiciary as dem ”save” educational development for di kontri.

”E recognise di fact say without education, rule of law no go dey. I thank di judiciary for saving educational development. Wetin happun be say for di past seven months, educational development pause particularly for public universities in Nigeria, and e no suppose be like dat.”

”Because wen dat fundamental pillar wey development rest on pause for seven months, e mean say di entire economic, di entire social development don also stop be dat, wey no suppose be like dat.

”Wetin di court do na to agree wit us say dem suppose grant interlocutory injunction against di academic staff union of universities to stop dem to end di strike, pending di hearing and determination of di substantive suit, wey go dey in accordance wit di rule of law.

”We dey happy because we gatz do something to ensure say di bedrock of development in Nigeria, education no collapse.”

‘We go check di best options for us’- ASUU

Counsel to ASUU Edoje Edoh tok say dem go go study di ruling and look into di available options to know wetin dem go do.

“Di court don rule say make ASUU stop di strike and return back di classrooms pending di outcome of di substantive suit. Plenty options dey open for di union, we go study di ruling wit di legal team and we go adopt di most appropriate option.”

National Association of Nigerian Students(NANS) President Umar Umar Barambu wey happy wit di court ruling beg goment to keep to di agreement wit di Union to avoid all dis strike wahala.

ASUU don down tools since February 14, 2022, and student don dey for house for over seven months now.

Di vacation judge go handover di case for reassigning.

Why Asuu dey strike

Di public universities lectureres dey demand di implementation of one agreement di federal goment sign wit dem for 2009 plus oda demands.

One of di major issues wey dey block negotiation between goment delegates and ASUU na di payment platform.

ASUU dey insist say goment must use to take pay dem salary.

Di president of ASUU Victor Emmanuel Osodeke say di National Information and Technology Development Agency (NITDA) wey suppose conduct integrity test on di University Transparency Accountability Solution (UTAS) don abandon am even afta dem upgrade di payment platform.

But Minister of Labour and Productivity, Chris Ngige say ASUU dey try prolong di strike by making negotiation impossible.

E explain give say why dem dey insist on UTAS even wen NITDA say e fail integrity test and pipo fit commit fraud on top di platform wey lead to huge moni.

Di rest of dia demands dey inside di 2009 agreement ASUU sign wit federal goment but ASUU say di goment still dey drag leg ontop di mata.